Prezident qaroriga muvofiq, O‘zbekiston Qurolli Kuchlari harbiy xizmatchilari, harbiy xizmatdan rezervga (iste’foga) bo‘shatilgan (chiqarilgan) fuqarolar va ularning oila a’zolarini uy-joy bilan ta’minlash tartibi takomillashtiriladi. Bu haqda «Nigoh» xabar berdi.
Qarorga muvofiq, harbiy xizmat majburiyatlarini bajarish vaqtida orttirilgan kasallik yoki olingan jarohati tufayli harbiy xizmatni o‘tashga yaroqsiz deb topilib, rezervga (iste’foga) bo‘shatilgan (chiqarilgan) O‘zbekiston Qurolli Kuchlari harbiy xizmatchilarini, shuningdek, halok bo‘lgan (vafot etgan) harbiy xizmatchilarning, ularning xizmat muddatidan qat’i nazar, oila a’zolari uy-joy bilan ta’minlanadi.
Shuningdek, harbiy xizmatchilar boshqa vazirlik va idoralar tizimiga haqiqiy harbiy xizmatni o‘tash uchun o‘tkazilganda, ularga berilgan xizmat xonadonlari ham tegishli vazirlik va idoralar tasarrufiga o‘tkaziladi.
Bandan tashqari, harbiy xizmatchilarga ajratiladigan uy-joy maydonining ijtimoiy normasini aniqlashda ularning oila a’zolari bilan bir qatorda qaramog‘iga olingan shaxslar toifasiga aniqlik kiritiladi, deyiladi xabarda.
Qarorga asosan, umumiy harbiy xizmat muddati 20 yil bo‘lgan harbiy xizmatni o‘tab rezervga bo‘shatilgan fuqarolar davlat hisobidan turarjoy bilan ta’minlanadi, shu bilan birga ularning OTMlarda o‘qish davri hamda davlat organlari va tashkilotlaridagi mehnat faoliyati yillari haqiqiy harbiy xizmat yillari davriga qo‘shib hisoblanadi.
Eslatib o‘tamiz, avvalroq harbiy xizmatchilarning davlat majburiy sug‘urtasini amalga oshiruvchi monopoliya bekor qilingan edi.
