O‘zbekistonlik Olimpiada chempioni, og‘ir vazn toifasida (+90,7 kg) harakat qilib kelayotgan Bahodir Jalolov (10−0, 10KO) AQShning Nyu-York shahridagi arenada belgiyalik bokschi Jek Mulovaiga (11−2-1, 7KO) qarshi ringga ko‘tarilib, uni muddatidan avval mag‘lub etdi.
Jalolov jangning dastlabki daqiqalaridan ustunlikka erishdi. Uning ketma-ket zarbalaridan so‘ng Jek Mulovai 6-raundga kelib, nokdaunga uchradi va hakamga jangni davom ettira olishini bildirdi. 8 raundlik bahsning oxirgi raundida belgiyalik bokschi Bahodir Jalolovning chap qo‘l bilan yo‘llagan zarbasidan so‘ng nokautga uchradi.
Shu tariqa o‘zbekistonlik bokschi o‘zining professional boksdagi 11-jangida ham g‘alabali seriyasini davom ettirdi.
Eslatib o‘tamiz, Bahodir Jalolov so‘nggi jangini Birlashgan Arab Amirliklarining Dubay shahrida o‘tgan Probellum Dubai boks kechasida polshalik Kamil Sokolovskiga qarshi o‘tkazgan edi. 8 raunddan iborat jangda Jalolov 5-raundda raqibini chap qo‘lda yo‘llagan zarbasi evaziga ringga qulatib, texnik nokaut bilan g‘alaba qozongan edi.
