Ўзбекистонлик Олимпиада чемпиони, оғир вазн тоифасида (+90,7 кг) ҳаракат қилиб келаётган Баҳодир Жалолов (10−0, 10КО) АҚШнинг Нью-Йорк шаҳридаги аренада бельгиялик боксчи Жек Муловаига (11−2-1, 7КО) қарши рингга кўтарилиб, уни муддатидан аввал мағлуб этди.
Жалолов жангнинг дастлабки дақиқаларидан устунликка эришди. Унинг кетма-кет зарбаларидан сўнг Жек Муловаи 6-раундга келиб, нокдаунга учради ва ҳакамга жангни давом эттира олишини билдирди. 8 раундлик баҳснинг охирги раундида бельгиялик боксчи Баҳодир Жалоловнинг чап қўл билан йўллаган зарбасидан сўнг нокаутга учради.
Шу тариқа ўзбекистонлик боксчи ўзининг профессионал боксдаги 11-жангида ҳам ғалабали сериясини давом эттирди.
Эслатиб ўтамиз, Баҳодир Жалолов сўнгги жангини Бирлашган Араб Амирликларининг Дубай шаҳрида ўтган Probellum Dubai бокс кечасида польшалик Камил Соколовскига қарши ўтказган эди. 8 раунддан иборат жангда Жалолов 5-раундда рақибини чап қўлда йўллаган зарбаси эвазига рингга қулатиб, техник нокаут билан ғалаба қозонган эди.
