Prezident Shavkat Mirziyoyev 26 noyabr kuni O‘zbekistonda amaliy tashrif bilan bo‘lib turgan Jahon bojxona tashkiloti bosh kotibi Kunio Mikuriyani qabul qildi, deb xabar berdi davlat rahbari matbuot xizmati.
O‘zbekiston Jahon bojxona tashkilotiga 1992 yildan a’zo. Keyingi yillarda mazkur tashkilot bilan hamkorlik sezilarli darajada faollashdi.
Tashkilot ko‘magida 2020 yil yanvar oyida «Yagona darcha» avtomatlashtirilgan tizimi, Bojxona nazoratini muvofiqlashtirish bo‘yicha situatsion markaz ishga tushirildi. Yaqinda O‘zbekiston Bojxona laboratoriyasi Jahon bojxona tashkilotining Mintaqaviy laboratoriyasi maqomini oldi.
O‘zbekiston Davlat bojxona qo‘mitasining Bojxona instituti ushbu xalqaro tuzilmaning Tadqiqotlar dasturida akkreditatsiyadan o‘tdi.
Bojxona xodimlarining malakasini oshirishga ko‘maklashilmoqda. Keyingi bir necha yilda yurtimizning 200 nafardan ziyod bojxonachisi tashkilotning qisqa muddatli o‘quv kurslarida ishtirok etdi.
Kecha Toshkentda o‘tgan mintaqa mamlakatlari bojxona xizmatlari vakillarining uchrashuvi ham samarali bo‘ldi.
Bosh kotib Kunio Mikuriya bilan uchrashuvda O‘zbekiston Davlat bojxona qo‘mitasi faoliyatini takomillashtirish va uning samaradorligini oshirish bo‘yicha hamkorlik masalalariga alohida e’tibor qaratildi.
Shavkat Mirziyoyev raqamlashtirish, ilg‘or xalqaro standartlarni joriy etish, intellektual tizimlardan foydalangan holda bojxona postlarini modernizatsiya qilish, korrupsiya, kontrabanda va bojxona sohasidagi qoidabuzarliklarga qarshi kurashish borasidagi normativ-huquqiy bazani takomillashtirish, mutaxassislar tayyorlash va boshqa yo‘nalishlarda qo‘shma tadbir va loyihalarni amalga oshirish muhim ekani qayd etdi.
U shuningdek tez fursatda Jahon savdo tashkilotiga kirishi bilan bog‘liq masalalarda yaqindan hamkorlik qilish zarur ekani ta’kidladi.
O‘zbekiston va Jahon bojxona tashkiloti o‘rtasidagi amaliy sheriklikni kengaytirish bo‘yicha yangi «yo‘l xaritasi»ni qabul qilishga kelishib olindi.
