Президент Шавкат Мирзиёев 26 ноябрь куни Ўзбекистонда амалий ташриф билан бўлиб турган Жаҳон божхона ташкилоти бош котиби Кунио Микурияни қабул қилди, деб хабар берди давлат раҳбари матбуот хизмати.
Ўзбекистон Жаҳон божхона ташкилотига 1992 йилдан аъзо. Кейинги йилларда мазкур ташкилот билан ҳамкорлик сезиларли даражада фаоллашди.
Ташкилот кўмагида 2020 йил январь ойида «Ягона дарча» автоматлаштирилган тизими, Божхона назоратини мувофиқлаштириш бўйича ситуацион марказ ишга туширилди. Яқинда Ўзбекистон Божхона лабораторияси Жаҳон божхона ташкилотининг Минтақавий лабораторияси мақомини олди.
Ўзбекистон Давлат божхона қўмитасининг Божхона институти ушбу халқаро тузилманинг Тадқиқотлар дастурида аккредитациядан ўтди.
Божхона ходимларининг малакасини оширишга кўмаклашилмоқда. Кейинги бир неча йилда юртимизнинг 200 нафардан зиёд божхоначиси ташкилотнинг қисқа муддатли ўқув курсларида иштирок этди.
Кеча Тошкентда ўтган минтақа мамлакатлари божхона хизматлари вакилларининг учрашуви ҳам самарали бўлди.
Бош котиб Кунио Микурия билан учрашувда Ўзбекистон Давлат божхона қўмитаси фаолиятини такомиллаштириш ва унинг самарадорлигини ошириш бўйича ҳамкорлик масалаларига алоҳида эътибор қаратилди.
Шавкат Мирзиёев рақамлаштириш, илғор халқаро стандартларни жорий этиш, интеллектуал тизимлардан фойдаланган ҳолда божхона постларини модернизация қилиш, коррупция, контрабанда ва божхона соҳасидаги қоидабузарликларга қарши курашиш борасидаги норматив-ҳуқуқий базани такомиллаштириш, мутахассислар тайёрлаш ва бошқа йўналишларда қўшма тадбир ва лойиҳаларни амалга ошириш муҳим экани қайд этди.
У шунингдек тез фурсатда Жаҳон савдо ташкилотига кириши билан боғлиқ масалаларда яқиндан ҳамкорлик қилиш зарур экани таъкидлади.
Ўзбекистон ва Жаҳон божхона ташкилоти ўртасидаги амалий шерикликни кенгайтириш бўйича янги «йўл харитаси»ни қабул қилишга келишиб олинди.
