Koronavirus infeksiyasiga chalingan toshkentlik bemor o‘tkir nafas va yurak yetishmovchiligidan vafot etdi, deya xabar qildi Sog‘liqni saqlash vazirligi.
Qayd etilishicha, Toshkent shahri Yunusobod tumanida yashovchi 49 yoshli N.U. (ayol kishi) bir necha kun davomida tana haroratining ko‘tarilishi, tomog‘ida og‘riq va holsizlik bo‘lishiga qaramasdan shifokorlarga o‘z vaqtida murojaat qilmagan.
Joriy yil 3 iyul kuni bemor xususiy klinikada koronavirusga tahlil topshirgan. Shu kuni ahvoli og‘irlashganligi sababli 7-son shahar klinik shifoxonasining reanimatsiya bo‘limiga yotqizilib, sun’iy nafas olish apparatiga ulangan.
Unga “Ikki tomonlama pnevmoniya, o‘tkir nafas va yurak qon-tomir yetishmovchiligi, koma I” tashxisi qo‘yilgan. Bemorning davolanishi davomida kunlik ahvoli malakali shifokorlar tomonidan doimiy nazoratga olingan.
Biroq shifokorlarning standartlar asosida o‘tkazgan reanimatsion muolajalariga qaramasdan bemor o‘tkir nafas va yurak yetishmovchiligidan vafot etdi.
4 iyul kuni O‘zbekistonda jami 3 nafar koronavirus bemori hayotdan ko‘z yumdi. Avvalroq Toshkentda shifokorlarga o‘z vaqtida murojaat qilmagan 45 yoshli erkak va 71 yoshli onaxon ushbu infeksiya asoratlaridan vafot etgani xabar qilingan edi.
