Коронавирус инфекциясига чалинган тошкентлик бемор ўткир нафас ва юрак етишмовчилигидан вафот этди, дея хабар қилди Соғлиқни сақлаш вазирлиги.
Қайд этилишича, Тошкент шаҳри Юнусобод туманида яшовчи 49 ёшли Н.У. (аёл киши) бир неча кун давомида тана ҳароратининг кўтарилиши, томоғида оғриқ ва ҳолсизлик бўлишига қарамасдан шифокорларга ўз вақтида мурожаат қилмаган.
Жорий йил 3 июль куни бемор хусусий клиникада коронавирусга таҳлил топширган. Шу куни аҳволи оғирлашганлиги сабабли 7-сон шаҳар клиник шифохонасининг реанимация бўлимига ётқизилиб, сунъий нафас олиш аппаратига уланган.
Унга «Икки томонлама пневмония, ўткир нафас ва юрак қон-томир етишмовчилиги, кома I» ташхиси қўйилган. Беморнинг даволаниши давомида кунлик аҳволи малакали шифокорлар томонидан доимий назоратга олинган.
Бироқ шифокорларнинг стандартлар асосида ўтказган реанимацион муолажаларига қарамасдан бемор ўткир нафас ва юрак етишмовчилигидан вафот этди.
4 июль куни Ўзбекистонда жами 3 нафар коронавирус бемори ҳаётдан кўз юмди. Аввалроқ Тошкентда шифокорларга ўз вақтида мурожаат қилмаган 45 ёшли эркак ва 71 ёшли онахон ушбу инфекция асоратларидан вафот этгани хабар қилинган эди.
