Covid-19 koronavirus infeksiyasini yuqtirgani tasdiqlangan sakkiz kishi orasida og‘ir holatdagi bemorlar yo‘q, deya xabar qildi 16 mart kuni sog‘liqni saqlash vaziri Alisher Shodmonov «O‘zbekiston 24» telekanaliga bergan intervyusida.
Avval xabar qilinganidek, virus yuqtirganlarning olti nafari 11 mart kuni Parijdan kelgan va 15 mart kuni virus aniqlangan ayolning oila a’zolaridir. Yana ikkita holat 15 mart kuni Istanbuldan va 14 mart kuni Londondan kelgan O‘zbekiston fuqarolarida aniqlandi.
«Xodimlarimiz aeroportda teplovizor yordamida Turkiyadan kelgan fuqaroning harorati borligini aniqladi. Maxsus tez tibbiy yordam avtomobilida u Virusologiya institutiga olib borildi, u yerda tahlil o‘tkazildi va ushbu kasallik aniqlandi. Fuqaro aeroportni tark etmadi», — dedi Alisher Shodmonov.
Sog‘liqni saqlash vazirligi IIV bilan birgalikda Istanbuldan Toshkentga kelgan fuqarolar bilan ularning yashash joylarida suhbatlar o‘tkazib, ular karantinga olindi.
16 mart holatiga ko‘ra 641 kishi tibbiy muassasalarga karantinga qo‘yildi — ularga hali kasallik tashxisi qo‘yilmagan, ammo ular yuqtirgan bemorlar bilan aloqada bo‘lishgan. Shulardan 49 nafari Virusologiya institutida, 85 nafari 6-Toshkent shahar klinik shifoxonasida, 181 nafari Toshkent viloyatining Qibray tumanidagi Bo‘ston sanatoriysida, 212 nafari (Seuldan kelgan) Chirchiq shahridagi «Energetik» sanatoriyasida, 114 nafari xususiy klinika, dedi vazir.
Alisher Shodmonov, shuningdek, 5661 nafar fuqaro uy karantinida ekanligini ta’kidladi. Ular yuqtirilgan bemorlar bilan to‘g‘ridan-to‘g‘ri aloqa qilmagan, ammo hozirda tibbiy muassasada karantinda bo‘lganlar bilan aloqada bo‘lishdi.
16 mart kuni Namanganga qo‘ndirilgan Riga-Toshkent reysi yo‘lovchilari Namangan viloyatining Kosonsoy va To‘raqo‘rg‘on tumanlaridagi sanatoriya va davolash muassasalariga karantinga yuborildi. Erondan evakuatsiya qilingan 37 fuqaro ham yerga yetkaziladi.
