Bojxona xodimlari madaniy ahamiyatga ega bo‘lgan qadimiy tangalarni bojxona chegarasi orqali noqonuniy olib o‘tilishiga chek qo‘yishdi. Bu haqda Davlat bojxona qo‘mitasi matbuot xizmati xabar berdi.
Jumladan, Surxondaryo viloyati bojxona boshqarmasi «Ayritom» chegara bojxona posti xodimlari tomonidan fuqaro M.Sh. belgilangan tartibda bojxona nazoratidan o‘tkazildi. Natijada, ushbu shaxs deklaratsiyada ko‘rsatmasdan va bojxona xodimiga ma’lum qilinmagan 8 dona qadimiy tangalarni olib o‘tayotganligi aniqlandi.
Ekspertiza xulosalariga asosan, ashyoviy dalil sifatida olingan 2 dona tanga miloddan avvalgi I-II asrlarda buyuk Evkratid I boshqaruvidagi Yunon-Baqtriya podsholigi davrida, 2 dona tanga Milodiy I-II asrlarda Kushon podsholigi davrida va yana 2 donasi 70−80 yil muqaddam AQSH da zarb qilingani hamda 2 dona tanga arab yozuvlari bitilgan XIX asrga oid ekanligi ma’lum bo‘lib, ularning umumiy qiymati 63,5 million so‘mni tashkil qildi.
Yuqorida ashyoviy dalil sifatida olingan tangalar Surxondaryo viloyati Arxeologiya muzeyiga topshirildi.
Hozirda ushbu holatlar yuzasidan bojxona tekshiruvlari olib borilmoqda.
