Namangan viloyatida is gazidan zaharlanish bilan bog‘liq turli ko‘ngilsiz hodisalarning oldini olish maqsadida yaratilgan qurilmani ishlab chiqarish yo‘lga qo‘yildi. Bu haqda «Xalq so‘zi» nashri xabar qildi.
FVV tomonidan tashkil etilgan kuz-qish mavsumida aholi xonadonlarida isitish tizimi va yoqilg‘i mahsulotlaridan foydalanish xavfsizlik talablariga rioya etilishini ta’minlash hamda bu borada yuzaga kelishi mumkin bo‘lgan favqulodda vaziyatlarning oldini olish kabi masalalarga bag‘ishlangan matbuot anjumanida qurilmaning afzalliklar xususida ham batafsil ma’lumotlar berildi.
«Ushbu qurilmani Namangan viloyatida ishlab chiqarish yo‘lga qo‘yildi, — deydi „Aholini is gazidan zaharlanish va yong‘inning oldini olish“ MCHJ direktori Husanboy Yunusov. — Qurilmaning afzallik jihatlar ko‘p. Misol uchun, u xonadonning maxsus isitish tizimiga o‘rnatiladi. Agarda uyda biror sabab bilan metan, propan va boshqa is gazlari chiqadigan bo‘lsa, qurilma ishga tushib, uni aniqlab beradi hamda signal chala boshlaydi».
Agarda xonadonda is gazi paydo bo‘lgan paytda uyda hech kim bo‘lmasa, qurilma gazni tarmoqdan avtomatik ravishda o‘chiradi. Qurilma elektr energiyaga ulangan holda ishlaydi. Shu orqali u elektr quvvatini o‘zida jamlaydi. Bu esa qurilma elektr energiyasi tizimdan uzilgan hollarda ham 24 soat ishlab turish imkonini beradi.
Mutaxassislarning aytishicha, ayni paytda qariyb mingga yaqin ana shunday qurilma ishlab chiqarilgan bo‘lib, dastlab 20 tasi Toshkent shahar IIBB ob’ektlariga o‘rnatilgan. Kelgusida uni aholi xonadonlarida ham foydalanish maqsadga muvofiq ekani ta’kidlandi. Qurilmaning o‘rtacha narxi 195 ming so‘m atrofida.
