Тошкент шаҳрининг собиқ ҳокими, тадбиркор Жаҳонгир Ортиқхўжаев ўзига тегишли еттита компанияни сотиб юборган. Бу ҳақда унинг ўзи Термиз шаҳрида бўлиб ўтган бизнес-марафонда айтиб ўтди.
«Crafers`ни сотдим, чунки мен унда обрў қозона олмадим, яъни мен эплаштиролмадим бу соҳани, масалан, ишлаб чиқаришни, озиқ-овқатни. Mediapark`ни сотдим ҳамма «магазин»лари билан. Ким ишлаётган бўлса, ўшанга сотдим. Масалан, Ecobozor`нинг сотдим биттасини. Akfa Lighting`ни сотдим. Magic City`ни сотдим. Яна нималарни сотдик?.. Basalt`ни ҳам немисларга сотдим, Basalt`ни Knauf`га», — деди у.
Собиқ ҳокимнинг айтишича, у ҳар беш йилда «ўзини ўзи тозалаб олади». «Мен айтмоқчиманки, беш йилда ўзимни ўзим тозалаб оламан битта. Керакмасми, мен унга қизиқмаяпманми, унга пул тикмаяпманми — сотаман. Яна бошқа очавераман… Ичидан яхшиси чиқиб қолади, уни олиб қолиб, ривожлантираман, қолганларини тозалаб ташлайвераман», — деди у.
Пойтахтнинг собиқ раҳбари Akfa Lighting`ни яратиш учун 15 йил вақти кетганини айтди. «Умрим кетди. Лекин ундан кейин мен „лампочка“ билан шуғулланмоқчи эмасман, „включатель“ билан шуғулланмоқчи эмасман. „Просто не хочу, всё“», — деди у.
Жаҳонгир Ортиқхўжаев 2018 йилнинг декабридан 2023 йилнинг 16 январигача, пойтахтдаги энергетика инқирози фонида президент томонидан ишдан бўшатилгунига қадар Тошкент шаҳри ҳокимлигини бошқарган.
Сиёсатга киришдан олдин Ортиқхўжаев тадбиркор бўлган ва бир қанча муваффақиятли корхоналарга, жумладан, Akfa ва Artel`га асос солган. 2019 йил сентябрь ойида Ортиқхўжаев Spot нашрига берган интервьюсида бизнесни тарк этиши ҳақида гапирган эди.
Бироқ у давлат хизмати давомида бир қатор компаниялар, жумладан, 2021 йил октябрь ҳолатига кўра, Crafers, Akfa Lighting, Mediapark, Discovery Invest Akfa, Artel, Atlas, CityNet, Chimgan Plaza, Durable Beton каби жами 200 дан ортиқ савдо белгилари эгаси ҳисобланган J-United Group компаниясининг асосчиси бўлишда давом этди.
Ҳозир компания ихтиёрида 23 та савдо белгиси мавжуд.
Сотилган компаниялар ҳақида
Crafers қандолат фабрикаси 2018 йил октябрь ойида ташкил этилган. У 2021 йил август ойида сотувга қўйилган. Ҳозирда корхона ва ташкилотларнинг ягона давлат регистри маълумотларига кўра, устав капитали 551,1 миллиард сўм бўлган компаниянинг таъсисчилари Finland Butter хусусий корхонаси (52,4 фоиз) ва Нурулла Суннатуллаевич Руземухамедов (47,6 фоиз) ҳисобланади.
Finland Butter — ёғ-мой ва қандолат маҳсулотлари (Okeyk, Pankie, N’medov, Landor ва бошқалар) ишлаб чиқарувчи корхона — Ниғматилло Собировга тегишли.
Тадбиркор Нурулла Руземухамедов Chococream, Glory Food, New Life Medical, Dolci Organic каби яна бир қатор компанияларнинг улушдори ҳисобланади.
Mediapark компанияси 2015 йилда Ўзбекистондаги биринчи техника ва электроника дўконлари тармоғи сифатида ташкил этилган. Ҳозирда Mediapark Group таъсисчиси Махмуджан Наджимидинович Латипов бўлиб, у, шунингдек, Akfa Building Systems, Techno Profil (Atlas савдо мажмуалари), Maroon Trade (Joseph Joseph, Pearl, Señor & Señorita ва Seniorita Home брендлари эгаси), Novoget, Techno Alliance ва Comfortrent компанияларида улушдор ҳисобланади.
Magic City истироҳат боғи Миллий боғ ҳудудида 2021 йил июнь ойида очилган. Лойиҳа инвестори Akfa таркибига кирувчи Stargate Systems бўлган.
Устав капитали 426,9 миллиард сўм бўлган Stargate Systems компанияси таъсисчилари Tashkent Aquarium (86,2 фоиз) ва президентнинг собиқ маслаҳатчиси Абдужаббор Абдувоҳидовнинг (Жаҳонгир Ортиқхўжаевнинг қудаси) ўғли Алишер Абдужабборвич Абдувоҳидов (13,8 фоиз) ҳисобланади. Алишер АбдувоҳидовTashkent Aquarium`га тўла эгалик қилади (100 фоиз), шунингдек, Artel Technical School ва бошқа корхоналарда улушларга эга.
Биринчи Ecobozor бозори 2018 йилнинг март ойида Тошкент шаҳрининг Мирзо Улуғбек туманидаги собиқ трамвай депоси ўрнида очилган эди. Ҳозирда товар белгиси эгаси Саидқахромхон Саидазимхонович Саидазимов (48,5 фоиз), Фаррух Бахтиярович Мамаджанов (48,5 фоиз) ва Кассим Набил Адилга (3 фоиз) тегишли бўлган Gradient компанияси ҳисобланади.
Akfa компаниялар гуруҳи 2010 йилда энергия тежовчи лампалар ишлаб чиқаришга мўлжалланган Akfa Lighting заводига асос солган. Савдо белгиси ҳозирда 2021 йил август ойида ташкил этилган Smart Illumination компаниясига тегишли. Унинг асосчиси Музаффар Анварович Абдуллаев бўлиб, у Climate Solutions компаниясига ҳам эгалик қилади.
