Сешанба куни эрталаб Британиянинг Titan Airways авиакомпаниясининг А330−300 юк ташувчи самолёти (G-EODS) носозлик туфайли Тошкент аэропортидан Лондондаги Станстед аэропортига уча олмади. Бу ҳақда Uzbekistan Airports матбуот хизмати «Газета.uz» сўровига жавобан маълум қилди.
Носозлик соат 10:39 да самолёт AWC288 рейсини амалга ошириш учун 1-учиш-қўниш йўлагида турган пайтда аниқланган.
Самолётни 1-учиш-қўниш йўлагида шатакка олишга қарор қилинди. Учиш-қўниш йўлагини ушбу лайнер эгаллагани сабабли бир самолёт 2-йўлакка қўнди.
Аэропорт ёпилмади ва одатдагидек ишламоқда, дейилади матбуот хизмати хабарида. Самолёт тушдан кейин ҳавога кўтарилиши керак.
Эслатиб ўтамиз, Тошкентда кечаси кучли қор ёғиб, учиш-қўниш йўлакларини қордан тозалаш ишлари олиб борилаётган вақтда бир қатор рейслар бошқа йўналишлар орқали ҳаракатланди.