Seshanba kuni ertalab Britaniyaning Titan Airways aviakompaniyasining A330−300 yuk tashuvchi samolyoti (G-EODS) nosozlik tufayli Toshkent aeroportidan Londondagi Stansted aeroportiga ucha olmadi. Bu haqda Uzbekistan Airports matbuot xizmati “Gazeta.uz” so‘roviga javoban ma’lum qildi.
Nosozlik soat 10:39 da samolyot AWC288 reysini amalga oshirish uchun 1-uchish-qo‘nish yo‘lagida turgan paytda aniqlangan.
Samolyotni 1-uchish-qo‘nish yo‘lagida shatakka olishga qaror qilindi. Uchish-qo‘nish yo‘lagini ushbu layner egallagani sababli bir samolyot 2-yo‘lakka qo‘ndi.
Aeroport yopilmadi va odatdagidek ishlamoqda, deyiladi matbuot xizmati xabarida. Samolyot tushdan keyin havoga ko‘tarilishi kerak.
Eslatib o‘tamiz, Toshkentda kechasi kuchli qor yog‘ib, uchish-qo‘nish yo‘laklarini qordan tozalash ishlari olib borilayotgan vaqtda bir qator reyslar boshqa yo‘nalishlar orqali harakatlandi.