Андижон вилоятидаги пахта қабул қилиш жойида пахта хирмонида ёнғин содир бўлгани акс этган видео тарқалди. Унда бир уюм пахта хирмони ёнаётгани ва ёнғин бошқа хирмонга ҳам ўтганини кўриш мумкин.
Қишлоқ хўжалиги вазирлиги ҳолат юзасидан расмий муносабат билдирди. Аниқланишича, ёнғин 16 октябрь куни, Балиқчи тумани «Насриддинобод» МФЙда жойлашган «Tetratex» МЧЖга қарашли пахта қабул қилиш масканида содир бўлган.
Вазирликнинг ёзишича, ёнғин оқибатида 12 кг пахта хом-ашёси ёниб кетган. Ёнғин электр кабелларидаги носозлик туфайли қисқа туташув келиб чиқиши натижасида юзага келган.
«Ёнғин оқибатида Андижон-36 навли 1 сорт 2 синфга кирувчи пахтанинг юза қисми ёнган, „Tetratex“ МЧЖ раҳбари томонидан тадбиркорга маҳсулотга етказилган зарар аниқланиб, тўлиқ қоплаб берилган», — дейилади расмий муносабатда.
