Шавкат Мирзиёев 17 октябрь куни Пекин шаҳрига амалий ташриф доирасида Amer International индустриал-саноат холдинги раиси Ван Вэньин билан учрашди. Бу ҳақда президент матбуот хизмати хабар берди.
Amer International — Хитойнинг етакчи конгломератларидан бири. Илғор технологиялар, электроника, яримўтказгичлар саноати, кончилик ва қайта ишлаш тармоқларидаги лойиҳалар билан шуғулланади. Компания Fortune 500 глобал рейтингида 124-ўринни эгаллаган. Хитойда ва унинг ташқарисида умумий қиймати 60 миллиард доллардан зиёд бўлган лойиҳаларни амалга оширмоқда.
Компания мамлакатимизга Марказий Осиё минтақасидаги бизнесининг бош йўналиши сифатида қараётгани қайд этилди, дейилади хабарда.
Учрашувда мисни чуқур қайта ишлаш ва ундан юқори қўшилган қийматли инновацион ва харидоргир маҳсулотлар, шу жумладан, электротехника, электромобиллар учун аккумулятор батареялари, микроэлектроника ва яримўтказгичлар ишлаб чиқариш бўйича истиқболли лойиҳалар муҳокама қилинди.
Компания раиси Хорижий инвесторлар кенгаши фаолиятида иштирок этиши, Ўзбекистонда минтақавий офис очиш ҳамда қўшма инновацион лойиҳаларни тезлаштириш бўйича «йўл харитаси»ни қабул қилиш юзасидан келишувга эришилди.
