Ўзбекистонда вокзал биноларига шахсни тасдиқловчи ҳужжатсиз киришга рухсат берилди. Бу ҳақда Транспорт вазирлиги 12 октябрь куни Вазирлар Маҳкамасининг 2023 йил 17 апрелдаги қарорига асосланиб маълум қилди.
Ҳужжатга мувофиқ, ташриф буюрувчилар фақатгина вокзал биносига паспортсиз киришлари мумкин бўлади. Йўловчилар платформасига — перронга йўловчи поезд чипталарига эга бўлган йўловчилар ҳамда ҳаракатланиши чекланган бемор ёки кекса ёшдаги йўловчиларни кузатувчи ва кутиб олувчи фуқаролар шахсни тасдиқловчи ҳужжат билан ўтишлари мумкин бўлади.
Чипталари йўқ шахслар, шунингдек, чиптада кўрсатилган маълумотлар йўловчининг шахсини тасдиқлайдиган ҳужжатлардаги маълумотларга мос бўлмаган фуқароларнинг йўловчилар платформаси-перронга ва йўловчи ташиш вагонларига киришига йўл қўйилмайди.
Ўтган йиллар давомида вокзал ва аэропортларга кириш босқичма-босқич кучайтирилди. Йўловчилар назоратнинг бир неча босқичларидан ўтишга мажбур бўлдилар, кутиб олувчи ва кузатиб қўювчилар вокзал ва аэропортлар биноларига киритилмади.
Президент Шавкат Мирзиёев 2021 йил апрель ойида аэропортлар, шунингдек, темир йўл ва автовокзалларга киришни соддалаштириш тўғрисидаги қарорни имзолади.
Ҳужжатда аэропорт ва вокзалларнинг асосий назорат-ўтказиш пунктларини киришдаги бирламчи назорат-ўтказиш пунктлари билан бирлаштириш, аэропортлар ва вокзаллар биноларига хавфсизлик талабларига риоя қилган ҳолда эркин киришга рухсат бериш, шунингдек, аэропорт ва вокзаллар, уларга туташ ҳудудларда умумий овқатланиш, хизмат кўрсатиш ва савдо нуқталарини ташкил этиш кўзда тутилган.
Сентябрь ойида Тошкентдаги Марказий (Шимолий) вокзалда бир босқичли назорат пункти жорий этилди — ҳужжатларни текшириш ва багажни текшириш ҳозирда бир жойда амалга оширилмоқда.
Аввалроқ президент марказий вокзалларга автомобилларнинг киришига рухсат бериш имкониятларини ўрганиш топширилган қарорни имзолагани ҳақида ёзган эдик.
