Тошкент метрополитенининг Буюк ипак йўли метро бекатининг иккала кириш қисмида йўлкирани одам юзи орқали тўласа бўладиган Face ID қурилмаси синовдан ўтказилмоқда. Тизим Транспорт вазирлиги, ATTO тўлов тизими, «Алоқабанк» ҳамда Россиянинг VisionLabs ишлаб чиқарувчи компанияси ҳамкорлигида йўлга қўйилди.
ATTO тизими раҳбари ўринбосари Гафур Нурматовнинг «Газета.uz»га маълум қилишича, юз орқали пул тўлаш йўловчиларга нақд пул ёки транспорт картаси қолиб кетган вақтларда қўл келади. Фуқаро юзини қурилмага тутади, тизим унинг юзини аниқлаб, ATTO карта ҳисобидан пул ечиб олади.
Йўлкирани Face ID орқали тўлаш учун йўловчи АТТО мобил иловасида рўйхатдан ўтган бўлиши керак. Бунинг учун иловани юклаб олиш, агар у мавжуд бўлса, янгилаш керак. Ундан сўнг юзни сканер қилиб, транспорт картаси (ёки виртуал карта) билан боғлаш лозим.
Расмга тушаётганда юзни кўзойнак ёки соч тўсиб қўймаслиги мақсадга мувофиқ.
Тўловни амалга оширишда терминалда ўрнатилган экран камерасига 50 сантиметр оралиқ масофада яқинлашиш ва сканер қурилмаси таниб олиши учун 1−3 сония кутиш керак. Шундан сўнг «ўтиш» хабари пайдо бўлгач, йўл ҳақи юз биометрик маълумотлар боғланган транспорт картасидан ечиб олинади.
Тизим масъуллари бу тизим ҳозир фақат Буюк ипак йўли метро бекатида ишлаётгани, у синовдан муваффақиятли ўтса, бошқа бекатларда ҳам пайдо бўлишини маълум қилди.
