Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков Sevimli телеканалининг Zamon дастурига берган интервьюсида коронавирус «омикрон» штаммининг «кентавр» номини олган янги тури ҳақидаги хабарлар юзасидан муносабат билдирди.
Жаҳон соғлиқни сақлаш ташкилоти 7 июль куни «омикрон BA.2.75 ёки «кентавр» штаммининг кичик тури ривожланиши кузатилаётганини маълум қилди. Мазкур кичик турлар бу номни интернет фойдаланувчиларидан бирининг таклифи билан Центавр юлдуз туркумидаги галактика номидан олинди. Euronews иқтибос келтирган экспертларнинг фикрича, у омикрондан кейин доминант вариантга айланиши мумкин.
«Штаммнинг қандай номланиши жуда катта аҳамиятга эга эмас», — деди у. «Уларнинг ҳаммаси коронавирус. Вирув ҳар ойда янги бир шаклга, кўринишга эга бўлиши мумкин. «Кентавр»нинг юқиш тенденцияси, мутахассисларнинг фикрича, бирмунча юқори. Бир пайтнинг ўзида жуда кўп одамларни касаллантириши мумкин. Ҳатто «омикрон»нинг бошқа тури билан касалланган одам ҳам ушбу вирусни юқтириб олиши мумкинлиги ҳақида гапириляпти», — дея қайд этди у.
«Касалликнинг кечиш жиҳатларига эътибор берадиган бўлсак, «омикрон» штамми билан чақирилган қандай тури, бу — BA.1, BA.2 ми ёки бўлмаса «кентавр»ми, қатъи назар, касалликнинг кечиши қарийб ҳаммада бир хил. Рақамларга эътибор қаратадиган бўлсак, 98 фоиз ҳолатда касаллик енгил кечяпти. касалликка қарши ким эмланган бўлса, уларда касаллик енгил, асоратларсиз ўтяпти», — деди у.
Нурмат Отабеков «кентавр» Ўзбекистонга аллақачон кириб келган бўлиши мумкинлигини истисно этмади: «Ўзбекистон фуқаролари ҳозир дунёнинг хоҳлаган нуқтасида бўлиши мумкин. Шу нақтаи назардан вирус касалликнинг яширин даврида Ўзбекистонга кириб келган бўлиши мумкин».
Янги вакцинани ишлаб чиқиш зарурлигига келсак, у одамлар орасида COVID-19 қўзғатувчи ҳисобланган янги SARS-CoV-2 коронавируси топилганидан бери ушбу вируснинг деярли 17 минг мутацияси аниқланганини таъкидлади.
«Буларнинг ҳаммасига вакцина ишлаб чиқаришга эҳтиёж йўқ. Коронавирусга қарши ишлатиладиган вакцинанинг ўзи бу касалликлардан ҳимоя қилади. Шу нуқтаи назардан қўшимча вакцина ишлаб чиқаришга ҳеч қандай эҳтиёж йўқ. Мавжуд вакциналар билан эмланишнинг ўзи ва бустер доза билан эмланишнинг ўзи кифоя қилади», — дея таъкидлади у.
