Тошкент давлат аграр университетининг собиқ ректори Ботиржон Сулаймонов ҳибсга олинди. Бу ҳақда олий ва ўрта махсус таълим вазири Абдуқодир Тошқулов АОКАда ўтган матбуот анжуманида айтиб ўтди.
У Аграр университет ҳозирда Қишлоқ хўжалиги вазирлиги тасарруфидаги эканлиги, унга қишлоқ хўжалиги вазирининг ўзи ректорлик қилаётганини таъкидлади.
Абдуқодир Тошқуловнинг сўзларига кўра, университетда жуда катта аттестация ўтказилган ва жуда кўп ўқитувчилар ишдан бўшатилган. Собиқ ректор Ботир Сулаймонов иши бўйича эса тергов жараёни кетмоқда.
«Ботир Сулаймонов ишига келсак, мен Қонунчилик палатасида ҳам ишлаганман, тергов жараёни кетаётган пайтда бир нарса айтолмайман. Энг муҳими эҳтиёт чораси сифатида қамоқ жазоси қўлланилган. Ҳозир тергов жараёнлари кетмоқда. Дастлабки тергов натижалари ҳали эълон қилингани йўқ. Балки молиявий хатоликлар бўлиши мумкин, балки қабул билан [боғлиқ масала] бўлиши мумкин. Лекин баъзи ОТМларни биз ҳам текширганимизда суперконтрактда ўқиши керак бўлган бола оддий контракт билан ўқиш ҳолатлари ҳам чиқаяпти», — дея вазирнинг сўзларини келтирмоқда Daryo.
У шу аснода текширув бошлангани ҳақида ўз қарашига эгалигини айтиб, мазкур ҳолатлар бўйича бошқа таълим муассасаларида ҳам текширув ўтказилаётганини қўшимча қилди.
«Шунинг учун тергов тугагунча бир нарса айтолмаймиз. Лекин, хатоликлар бўлмаганда ректорга нисбатан бунақа катта иш бўлмас эди», — деди у.
Эслатиб ўтамиз, Ботиржон Сулаймонов 2020 йилнинг сентябридан 2021 йилнинг январига қадар қишлоқ хўжалиги вазирининг ўринбосари лавозимида фаолият юритган. Ўшанда у фақат Аграр университети ректори лавозимини ўзида сақлаб қолганди.
2021 йилнинг 11 сентябрига келиб, қишлоқ хўжалиги вазири Жамшид Ходжаевга Тошкент давлат аграр университети ректори вазифасини бажариш юкланганди. Ўшанда Ботиржон Сулаймонов ректорликдан олинганди.
