Жорий йилнинг январь-февраль ойларида Ўзбекистонга 18 та давлатдан 5948 та автомобиль (шундан февралда 2911 та) олиб келинди. Бу ҳақда Давлат статистика қўмитаси хабар берди.
2021 йилнинг дастлабки икки ойи билан солиштирганда, импорт 4873 та автомобилга ёки 5,5 баробарга ошган. Уларнинг умумий қиймати 124,5 млн долларни ташкил этиб, ўтган йилнинг шу даврига нисбатан етти баравардан кўпроқ ошганини кўрсатди.
Аввалгидек Хитой 3436 та машина билан биринчи ўринни эгаллади. Кейинги ўринда Жанубий Корея — Ўзбекистонга 1512 дона автомобиль экспорт қилган. Қозоғистон 502 та машина билан Россияни (431 та машина) ортда қолдириб, учинчи поғонага чиқди.
Кейинги ўринларни эса АҚШ (19 та автомобиль), Япония (15 та), Германия (9 та), Гонконг (5) ва Туркия (4) эгаллаган.
Давлат статистика қўмитаси, шунингдек, электромобиллар импортининг ҳам 3 баробарна ошганини маълум қилди. Икки ой ичида Ўзбекистонга 228 дона электромобиль олиб келинган.
Иқтисодий тадқиқотлар ва ислоҳотлар маркази февраль ойида хорижий автомобиллар билан транзакциялар сонининг кўпайганини қайд этди. Ой давомида бу кўрсаткич 26 фоизга, 2021 йилнинг февралига нисбатан эса 2,7 баробарга ошган.
Бунинг сабабларидан бири автомобиль сотиб олиш билан боғлиқ харажатларнинг камайиши бўлди. Январь ойида транспорт воситаларини сотиб олиш ва вақтинча олиб кириш учун йиғим бекор қилинди. Февралда президент топшириғига кўра янги олиб кирилаётган автомобиллар учун божхона тўловлари 50 фоизга камайтирилди.
«Келажакда бож ставкалари нолга тушиши керак. Бу қадам рақобатбардош автомобиль бозорини ривожлантириш, ўзбек халқини арзон ва сифатли автомобиллар билан таъминлаш имконини беради», — деган эди президент.
Бундан ташқари, маҳаллий ишлаб чиқарувчилар томонидан таклифнинг қисқариши хорижий автомобилларни танлашга ундамоқда. UzAuto Motors компанияси энг оммабоп моделлар бўйича шартнома тузишни 2 ойдан ортиқ муддатга тўхтатган эди. Шартнома тузиш март ойи бошида қайта тикланди.
