Президент топшириғи билан Иккинчи жаҳон уруши қатнашчиси Муҳиддин Дўсанбоевнинг набираси Тошкент давлат иқтисодиёт университетига грант асосида қабул қилинди, деб хабар бермоқда Daryo.
Тошкент вилояти ҳокими Зоир Мирзаев 8 май куни олий таълим вазири Конгратбай Шарипов билан бирга Мудофаа вазирлигининг Марказий ҳарбий клиник госпиталида бўлди. Масъуллар у ерда даволанаётган Муҳиддин Дўсанбоев ҳолидан хабар олиб, набираси Имона ўқишга қабул қилинганини айтди.
«Биз сизга муҳтарам президентимизнинг совғасини олиб келдик. Неварангизни Тошкент давлат иқтисодиёт университетига қабул қилдик грант асосида», — деди вазир.
Зоир Мирзаев қиз билан суҳбатда унинг банк соҳасига қизиқиши борлигини сезганини, бу «жуда замонавий, энг ривожланиб бораётган, келажаги бор соҳа» эканини айтди.
«Сиз ҳам лекин яхши йўналишга ўқишга киритган экансиз-а, банкирлик соҳасига? Яхши ўйлаб қилган экансиз», — деди у уруш қатнашчисига.
Бундан ташқари, Тошкент давлат иқтисодиёт университети ректори Тўлқин Тешабаев қиз университетнинг «бу йилги биринчи талабаси бўлганини» қайд этди.
Эслатиб ўтамиз, Ўзбекистон Қуролли кучлари ҳарбийлари ва ходимлари фарзандларининг квота асосида республика ОТМга ўқишга киришида тавсиянома бериш тартиби тўғрисидаги низомда ҳарбий хизматчиларнинг набираларига имтиёз тақдим этилиши кўзда тутилмаган.
