2021 йилда Ўзбекистонга 11 та хорижий давлатдан 809 та электромобиль импорт қилинган. Уларнинг қиймати 16,9 млн долларга тенг. Бу ҳақда Давлат статистика қўмитаси хабар берди.
Электромобиль импорти 2020 йилга нисбатан 679 тага ёки 6,2 бараварга ошган.
2021 йилда Ўзбекистонга импорт қилинган электромобилларнинг 90% Хитойдан олиб келинган. Электромобиллар қуйидаги давлатлардан импорт қилинган:
- Хитой — 724 та;
- Туркия — 24 та;
- АҚШ — 22 та;
- Литва — 13 та;
- Германия — 12 та;
- Корея — 5 та;
- Испания — 2 та;
- Россия — 2 та;
- Украина — 2 та;
- БАА — 2 та;
- Гонконг — 1 та.
Апрель ойида «Газета.uz» Фарғонада йил охиригача электромобилларни йиғиш йўлга қўйилиши кутилаётгани ҳақида ёзган эди. 520 млрд сўмлик қийматга эга инвестицион лойиҳа президент иштирокидаги йиғилишда тақдим этилганди. Мазкур лойиҳанинг умумий қиймати 520 млрд сўм бўлиб, объектнинг ишга туширилиш вақти 2021 йилнинг ноябрь ойига белгиланганлиги айтилган эди.
Март ойида Молия вазирлиги мамлакат ичида электромобил харид қилиш ва уларни вақтинча олиб кириш учун тўловларни бекор қилиш бўйича таклиф киритган эди. 2020 йилда Ўзбекистон 2,9 млн доллар қийматга эга 131 та электромобиль импорт қилган.
«Ўзавтосаноат» компанияси Ўзбекистонда электромобиллар ишлаб чиқарилиши 2025 йилда бошланиши ҳақида маълум қилган эди.
Фарғона вилоятида декабрь ойида «Central Asia Motors» корхонасида 4 та енгил ва 8 та юк электромобиллари тест режимида ишлаб чиқарилади. Корхона тўла қуввати билан ишга тушгач, йилига 10 минг электромобиль ишлаб чиқариши кутилмоқда. Ишлаб чиқарилган маҳсулотнинг 40 фоизи экспорт қилинади.
Эслатиб ўтамиз, 2021 йилнинг январь-сентябрь ойларида Ўзбекистонга 9 та хорижий давлатдан қиймати 10,5 млн долларга тенг бўлган 558 та электромобиль импортқилинган.
