2021 йилнинг январь-сентябрь ойларида Ўзбекистонга 9 та хорижий давлатдан қиймати 10,5 млн АҚШ долларига тенг бўлган 558 та электромобиль импорт қилинган. Бу ҳақда Давлат статистика қўмитаси хабар бермоқда.

Электромобиль импорти ўтган йилнинг мос даври билан солиштирилганда 476 тага ёки қарийб 7 бараварга ошган.

2021 йилнинг 9 ойида электромобиллар асосан қуйидаги давлатлардан импорт қилинган:

  • Хитой — 499 та;
  • Туркия — 24 та;
  • Литва — 13 та;
  • Германия — 8 та;
  • АҚШ — 6 та;
  • Корея — 5 та;
  • Испания — 1 та;
  • Россия — 1 та;
  • Гонгконг — 1 та.

2021 йилнинг сентябрь ойида Ўзбекистон хориждан 57 та электромобиль импорт қилинган.

Апрель ойида «Газета.uz» Фарғонада йил охиригача электромобилларни йиғиш йўлга қўйилиши кутилаётгани ҳақида ёзган эди. 520 млрд сўмлик қийматга эга инвестицион лойиҳа президент иштирокидаги йиғилишда тақдим этилганди. Мазкур лойиҳанинг умумий қиймати 520 млрд сўм бўлиб, объектнинг ишга туширилиш вақти 2021 йилнинг ноябрь ойига белгиланганлиги айтилган эди.

Март ойида Молия вазирлиги мамлакат ичида электромобил харид қилиш ва уларни вақтинча олиб кириш учун тўловларни бекор қилиш бўйича таклиф киритган эди. 2020 йилда Ўзбекистон 2,9 млн доллар қийматга эга 131 та электромобиль импорт қилган.

«Ўзавтосаноат» компанияси Ўзбекистонда электромобиллар ишлаб чиқарилиши 2025 йилда бошланиши ҳақида маълум қилган эди.

Фарғона вилоятида декабрь ойида «Central Asia Motors» корхонасида 4 та енгил ва 8 та юк электромобиллари тест режимида ишлаб чиқарилади. Корхона тўла қуввати билан ишга тушгач, йилига 10 минг электромобиль ишлаб чиқариши кутилмоқда. Ишлаб чиқарилган маҳсулотнинг 40 фоизи экспорт қилинади.