Тошкентнинг Яккасарой тумани Бобур кўчасида, Пушкин майдони яқинида жойлашган Миллатлараро муносабатлар ва хорижий давлатлар билан дўстлик алоқалари қўмитаси биносини реконструкция қилиш лойиҳаси 35,4 млрд сўмга баҳоланмоқда. Давлат харидлари порталига жойлаштирилган маълумотга Davletovuz Telegram канали эътибор қаратди.
Фото: Яндекс.Харита.
Тендерда қатнашиш учун «Трест-12» ва Power Construction Planet (ҳозирда — Discover Invest) ариза топширган. 8 сентябрь куни тендер комиссияси 35,41 млрд сўм (рақобатчиси таклифидан 157,1 млн сўм кам) ва 214 кунлик муддат («Трест-12»да — 250 кун) таклиф қилган Discover Invest компаниясини ғолиб сифатида танлади.
9 сентябрь куни Тошкент ҳокимлиги ҳузуридаги «Ягона буюртмачи хизмати» инжиниринг компанияси Discover Invest билан шартнома имзолади. Лойиҳа 2021 йилнинг иккинчи чорагида давлат бюджети даромадларининг ортиқча бажарилган қисми ва маҳаллий бюджетга ажратиладиган маблағлар ҳисобидан молиялаштирилади.
Лойиҳада қўмита бино ва иншоотларини реконструкция қилиш, туташ ҳудудни кўкаламзорлаштириш ва ободонлаштириш, кўча ва йўлларни асфальтлаш, шунингдек, пиёдалар йўлигини чорқирра тош билан қоплаш кўзда тутилган.
Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқалари қўмитаси 2017 йил май ойида Республика байналмилал маркази ҳамда Хорижий мамлакатлар билан дўстлик ва маданий-маърифий алоқалар жамиятлари кенгаши базасида ташкил этилган.
Корхона ва ташкилотларнинг ягона давлат реестри (КТЯДР) маълумотларига кўра, Discover Invest 2008 йил сентябрида рўйхатга олинган. 67 фоиз улуш Исмоил Исроилов, 33 фоизи эса компания раҳбари ҳисобланган Абдурасул Зоҳидовга тегишли.
Исмоил Исроилов илгари Akfa Engineering and Management компанияси директори ва директор ўринбосари бўлиб ишлаган. Шунингдек, у Kolorpak босмахонасида (36,7 фоиз) ва Zo‘r TV телерадиоканалида (50 фоиз) улушларга эга. 2020 йил январида Абдурасул Зоҳидов Discover Invest компанияси директори сифатида «Дўстлик» ордени билан тақдирланди (у Tashkent City ва Ашхобод боғлари, Конгресс маркази бўлган Hilton меҳмонхонаси, Imzo ва Artel заводлари, Akfa Medline ва бошқа иншоотларни қурган).
Интеллектуал мулк агентлигининг «Интеллектуал Мулк» ахборот-қидирув тизимига кўра, Discover Invest савдо белгиси Power Construction Planet (ҳозирги — Discover Invest) компаниясига тегишли бўлиб, белгини (патентни) рўйхатдан ўтказиш учун ариза ягона таъсисчиси Тошкент ҳокими Жаҳонгир Ортиқхўжаев бўлган J-United Group томонидан берилган. Бу компания жами 200 дан ортиқ савдо белгиларига эгалик қилади.
