Ўзбекистонда ҳокимият вакилига қаршилик кўрсатганлик учун жавобгарлик кучайтирилмоқда. Бу ҳақда Олий Мажлис Сенати ахборот хизмати хабар берди.
Маълум қилинишича, Сенатнинг ўн тўққинзинчи ялпи мажлисида «Ўзбекистон Республикасининг Жиноят кодексига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартишлар киритиш ҳақида"ги қонуни муҳокамада бўлди.
Қонун билан биринчи йўналиш — Жиноят кодексининг ҳокимият вакилига ёки фуқаровий бурчини бажараётган шахсга қаршилик кўрсатиш билан боғлиқ жиноят учун жазо чоралари кучайтирилмоқда. Иккинчи йўналиш — МЖтКга ИИО ходими ёки Миллий гвардия ҳарбий хизматчисининг қонуний талабларини бажармаганлик, уларнинг ўз хизмат бурчларини бажаришларига қаршилик кўрсатганлик ва ҳокимият вакилининг қонуний талабларини бажармаслик ёки хизмат вазифаларини бажаришига тўсқинлик қилганлик учун жавобгарликни кучайтиришни назарда тутувчи ўзгартишлар киритилмоқда.
Сенатор Шуҳрат Чўлиевнинг берган маълумотларига кўра, ИИО ходимларининг ҳуқуқбузарликларни тўхтатиш, ҳужжатларни текшириш учун тақдим этиш, транспорт воситасини тўхтатиш каби қонуний талабларни бажармаслик борасида 2018 йили 24 минг 185 та маъмурий ҳуқуқбузарлик қайд этилган. Ушбу кўрсаткич 2019 йилда 29 минг 575 тани, 2020 йилда эса 38 минг 911 тани ташкил этган.
Шунингдек, қўлланилган жазо чораларига қарамасдан фуқаролар томонидан 2018 йилда 972 та, 2019 йилда 2265 та, 2020 йилда эса 4169 та маъмурий ҳуқуқбузарлик такроран содир этилган.
Маълумотга кўра, ҳокимият вакилига фаол қаршилик кўрсатганлик учун ЖКнинг тегишли моддаси билан 2018 йилда 248 та, 2019 йилда 243 та, 2020 йилда эса 251 та жиноят иши судларга юборилган.
«Мазкур қонун билан мамлакатда Жиноят кодексида ҳокимият вакилига қаршилик кўрсатганлик учун жавобгарликни белгилаш орқали ҳокимият вакилларининг ҳуқуқий ҳимояси таъминланади», — дейилади хабарда.
Қонун сенаторлар томонидан маъқулланди.
Эслатиб ўтамиз, июнь ойида ҳокимият вакилига қаршилик кўрсатганлик учун жиноий жавобгарлик кучайтирилаётгани ҳақида хабар берилган эди. Жарима миқдори БҲМнинг 50 бараваридан 100 бараваригача оширилиши айтилган. Шунингдек, 1 йилдан 3 йилгача озодликни чеклаш жазо чораси киритилиши, озодликдан маҳрум қилиш жазоси 1 йилдан 3 йилгача узайтирилиши таъкидланган.
Қонунчилик палатаси депутати Алишер Қодиров бунга ҳуқуқни муҳофаза қилувчиларнинг қонуний фаолиятига қаршилик кўрсатиш сони ошиб бораётганлигини сабаб қилиб кўрсатган эди. Унинг қайд этишича, сўнгги вақтларда ҳуқуқни муҳофаза қилувчиларга тажовуз кайфияти ортиб бормоқда. «2018 йилдаги 24,1 минг ҳолат 2020 йилда 39 мингтага ортган», — деган эди у.
Депутат Дониёр Ғаниев эса бундай ҳолатлар ички ишлар органлари ходимларининг соғлиғига зарар бўлаётганини таъкидлади.
