Ҳокимият вакилига қаршилик кўрсатганлик учун жиноий жавобгарлик кучайтирилиши кутилаётганлиги ҳақида хабар берилган эди. Жарима миқдори БҲМнинг 50 бараваридан 100 бараваригача оширилади. Шунингдек, 1 йилдан 3 йилгача озодликни чеклаш жазо чораси киритилмоқда ва озодликдан маҳрум қилиш жазоси 1 йилдан 3 йилгача узайтирилади.

Мазкур ҳолат юзасидан «Миллий тикланиш» фракцияси раҳбари, депутат Алишер Қодиров телеграм-каналида изоҳ қолдирди.

Унинг таъкидлашича, сўнгги вақтларда ҳуқуқни муҳофаза қилувчиларга тажовуз кайфияти ортиб бормоқда. «2018 йилдаги 24,1 минг ҳолат 2020 йилда 39 мингтага ортган», — дейди у.

Алишер Қодировнинг таъкидлашича, ушбу ҳуқуқбузарлик такрор содир этилгани учун 1 йилдан 3 йилгача озодликни чеклаш қўлланиладиган бўлса, Францияда бундай қонунбузарлик учун 10 йилгача, АҚШда 5−7 йилгача озодикдан маҳрум қилишгача бўлган чоралар кўзда тутилган.

"Газета.uz"да реклама

«Интизом тараққиётнинг муҳим шарти. Тартиб бўлмаса тараққиёт ҳеч қачон бўлмайди», — дея қўшимча қилади Қодиров.

«Албатта, инсон хуқуқлари мамлакатимизда устувор! Ҳеч ким фуқароларнинг ҳуқуқларига тажовуз қилган давлат хизматчиларини химоя қилмоқчи эмас, уларга ҳам жазо муқаррар. Ҳуқуқингиз бузилдими, қаршилик кўрсатманг, куч ишлатманг, судга ёки юқори идорага шикоятингизни киритинг, тамом. Ҳуқуқбузар бўлманг, фуқаро сифатида ҳуқуқингизни ҳимоя қилишни ўрганинг», — дея таъкидлайди депутат.

Қонун лойиҳаси Қонунчилик палатаси ялпи мажлисида кўриб чиқилади.

Шунингдек, қуйи палата депутати Дониёр Ғаниев Twitter`да мазкур жиноий жавобгарлик кучайтирилишини ташаббускорлар нима билан изоҳлашаётгани ҳақидаги сўровга иккита асос билан жавоб берди.

У ҳам ҳокимият вакилининг қонуний фаолиятига қаршилик кўрсатиш сони ошганлигини қайд этган. Шунингдек, депутат ИИВ ва бошқа ходимларнинг соғлиғига зарар бўлаётганлигини таъкидлаган.