«Толибон» умумий амнистия эълон қилди, шу жумладан ҳукумат амалдорлари учун ҳам, дея хабар бермоқда РИА Новости Agence France-Presse`га таяниб.
«Сиз кундалик ҳаётингизга тўлиқ ишонч билан қайтишингиз мумкин», — дея агентлик ҳаракат вакилларининг баёнотидан иқтибос келтиради.
Бундан ташқари, TOLOnews телеканали аёл телебошловчи ва мухбирлар иштирокидаги кўрсатувларни намойиш этишда давом этмоқда. Бошловчи Беҳешта Арганд телеканал эфирида «Толибон» медиа гуруҳи аъзоси Мавлави Абдулхак Хемад билан Кобулдаги вазият ва шаҳардаги уйларни тинтув қилиш ҳақида интервью ўтказди.
«Ҳасиба Атакпал, бизнинг жасур журналистимиз Кобулдан жонли репортажни олиб бормоқда», — деб телеканал директори ўринбосари Абдул Фарид Аҳмад Twitter`да ёзиб, тегишли фотосуратни ижтимоий тармоққа жойлаштирди.
Фото: twitter.com/FaridAhmad1919
Эслатиб ўтамиз, кеча 16 август куни Толибон" Афғонистонда «уруш якунланганини» эълон қилган эди. Янги ҳукуматнинг тури ва шакли тез орада маълум қилинади.
Ҳудди шу куни Кобул аэропортида юзлаб одамлар Афғонистондан учадиган сўнгги самолётларга тирмашиб чиқишаётгани акс этган видеолар тарқалган эди. Улардан баъзилари самолётларнинг бортига, баъзилари эса тезликни ошираётган самолёт тагига қўллари билан илинмоқчи бўлганлар. Ҳозирда аэропортдаги ҳолатлардан сўнг бир неча киши ҳалок бўлгани маълум.
