Ўзбекистонда Хитой вакцинасидан ташқари бошқа давлатларда ишлаб чиқарилган вакциналар синови ҳам ўтказилади. Бу ҳақда инновацион ривожланиш вазири Иброҳим Абдураҳмонов «Халқ сўзи»га берган интервьюсида маълум қилди.
Унинг сўзларига кўра, Соғлиқни сақлаш вазирлиги томонидан нафақат Хитой вакцинаси, балки Россияда ишлаб чиқарилган ва ҳозирда кўпгина инсонларда синовдан ўтаётган Sputnik-V вакцинасини ҳам Ўзбекистонга келтириш бўйича ишлар йўлга қўйилган.
Иброҳим Абдураҳмоновнинг қайд этишича, Хитойдаги Sinopharm компаниясининг ўлдирилган, кучсизлантирилган вирусларга асосланган вакцинаси ҳам олиб келинмоқда. Бу анча олдинги технология бўлиб, мазкур вакцинанинг тайёгарлик даражаси юқори. Инновацион ривожланиш вазири мазкур вакцинани Ўзбекистонга олиб келиш билан Соғлиқни сақлаш вазирлиги шуғулланаётгани, унинг раҳбарлигидаги вазирлик эса рекомбинант оқсил молекуласига асосланган вакцинани олиб келаётганини айтиб ўтди.
«Халқимизни коронавирус вакцинаси билан таъминлаш учун биз бир неча хил вакцина синовларини ўтказишимиз керак. Бу — Россия вакциналари ҳам, Европадаги AstraZeneca ҳам, АҚШдаги Moderna компаниясининг вакциналари ҳам ёки мана Хитойнинг вакциналари ҳам бўлиши мумкин. Бир нечта вакцина синовини параллель равишда ўтказиш — давр тақозоси. Чунки коронавируснинг ҳам ҳар хил типлари бор. Бир ҳудудда яратилган вакцина иккинчи ҳудуд учун етарлича самарали бўлмаслиги мумкин. Аҳоли генетикасига қараб ҳам самараси ҳар хил бўлиши мумкин», — деб таъкидлаб ўтди инновацион ривожланиш вазири.
Аввалроқ Хитойда ишлаб чиқарилган коронавирусга қарши вакцина синовининг учинчи босқичи 5 мингга яқин ўзбекистонликда ўтказилиши режалаштирилаётгани ҳақида маълум қилган эдик. Шунингдек, Инновацион ривожланиш вазирлиги Хитой Фанлар Академияси билан Anhui Zhifei Longcom Biopharmaceutical томонидан ишлаб чиқарилган вакцинани учинчи босқич клиник синовларини Ўзбекистонда ўтказиш тўғрисида келишиб олган.
