Хитойда ишлаб чиқарилган коронавирусга қарши вакцина синовининг учинчи босқичи 5 мингга яқин ўзбекистонликларда ўтказилиши режалаштирилмоқда. Бу ҳақда Инновацион ривожланиш вазирлиги бўлим бошлиғи Феруза Хўжаеванинг «Kun.uz»га маълум қилди.
Феруза Хўжаеванинг таъкидлашича, Хитой Микробиология институтида ишлаб чиқилган вакцина синовининг учинчи босқичи Ўзбекистонда ҳам ўтказилиши бўйича келишув имзоланган. Ушбу битимга асосан, Хитой вакцинаси клиник синовларининг учинчи босқичи Ўзбекистонда 5000 га яқин кўнгиллиларда ўтказилади.
Ушбу мақсадда, мазкур вакцинани яратиш ва ишлаб чиқишда иштирок этган бир гуруҳ хитойлик олимлар 6 ноябрь куни Ўзбекистонга келиши кутилмоқда.
«Албатта, бу жуда мураккаб жараён. Вакцинани қўллаш учун уни бир неча босқичда синовдан ўтказиш керак. Бунинг икки босқичи Хитойда ўтказилган. Учинчиси эса бир қатор давлатлар билан бир қаторда бизнинг мамлакатда ҳам ўтказилади. Агар синовлар муваффақиятли якунланса, Ўзбекистон вакцинани имтиёзли нархларда сотиб олиш ҳуқуқига эга бўлади ҳамда вакцина Марказий Осиёнинг бошқа давлатларига Ўзбекистон орқали тарқатилиши назарда тутилган», — дейди Феруза Хўжаева.
Коронавирусга қарши кураш штаби аъзоси Барно Одилова вакцина синовларида қатнашган кўнгиллиларга ҳақ тўланиши мумкинлиги ҳақида хабар берган эди.
Эслатиб ўтамиз, Инновацион ривожланиш вазирлиги Хитой Фанлар Академияси билан Anhui Zhifei Longcom Biopharmaceutical томонидан ишлаб чиқарилган вакцинани учинчи босқич клиник синовларини Ўзбекистонда ўтказиш тўғрисида келишиб олгани ҳақида хабар берилган эди.
Коронавирусга қарши қурашда президент Шавкат Мирзиёев бош вазир ўринбосарига тез орада вакцина ишлаб чиқаришни бошлаши кутилаётган Хитой, Ҳиндистон, Буюк Британия, Россия фармацевтика компанияларидан вакцинани харид қилиш ва мамлакат аҳолиси вакцинациясини амалга ошириш йўлларини пухта ўрганиб чиқиш бўйича топшириқ берган эди.
