Prezident Shavkat Mirziyoyev Sirdaryo viloyati Sayxunobod tumanidagi Paxtakon mahallasida yashovchi bog‘bon Tursunboy ota Aripovga Tracker mashinasini sovg‘a qildi. Bu haqda O‘zA xabar bermoqda.
Agentlik xabariga ko‘ra, otaxon mehnat faoliyatini 15 yoshida kolxozda suvchilikdan boshlagan. Keyinroq tumanda tashkil etilgan bo‘rdoqichilik chorva fermasida 40 yil mehnat qildi. 2011-yilda nafaqaga chiqqach, tomorqasida uzumchilik bilan shug‘ullana boshladi. Uzoq yillar uzum yetishtirib, tok parvarishining hadisini oldi. Hozir uzumning rizamat, husayni, kelin barmoq, shohonaki, ketmon sop kabi navlarini ko‘paytirmoqda. Otaxon yangi “abatar” navini payvand qilganini aytdi.
Tursunboy ota turmush o‘rtog‘i Inoyatxon aya bilan 3 o‘g‘ilni tarbiyalab elga qo‘shdi. Bugungi kunda chol-kampir 16 nafar nevara-chevara ardog‘ida. O‘g‘illari Azizjon, Azimjon Azamatning katta tomorqalarida ham uzumning ko‘plab navlari parvarish qilinmoqda.
“Prezidentimizning tumanimizga tashrifi mening hayotimda eng baxtli, esda qolarli kun bo‘ldi. Tashrif chog‘ida yurtboshimiz menga Tracker avtomashinasini sovg‘a qildi. Keyin mahalladagi uzum yetishtiruvchilarga murabbiylik qilishimni aytdi. Ishonsangiz, haligacha hayajonim bosilgani yo‘q. Xushxabarning qo‘shqanoti bo‘ladi, deganlaridek, mahalla- ko‘y, tumanimiz, viloyatimiz, qolaversa, vodiydagi qarindoshlar, do‘st-birodarlarning tabriklari og‘ushida yashayapman. Farg‘ona vodiysining Oltiariq tumanidagi Uzumchi mahallasi singari endi bizning mahalla aholisi ham uzumchilik bilan shug‘ullanadi. Hamqishloqlarimga bu borada qo‘limdan kelganicha xizmat qilaman”, — dedi Tursunboy ota.
Prezident mart oyi o‘rtalarida Sayxunobod tumaniga tashrif buyurib, bir qator rahbarlar iste’foga chiqqanini e’lon qilgandi. Shuningdek, tomorqa imkoniyatlaridan foydalangan holda aholi daromadlarini oshirish bo‘yicha “Sayxunobod tajribasi” haqida gapirdi. Ushbu tajribani butun O‘zbekiston bo‘ylab yoyish reja qilindi.
