O‘zbekistonda yashirin iqtisodiyot hajmi yalpi ichki mahsulotga nisbatan 25 foizdan 45 foizgacha baholanmoqda. Bu ko‘rsatkichni Oliy Majlis Senatining 20-dekabr kuni bo‘lib o‘tgan majlisida bosh vazir o‘rinbosari, iqtisodiyot va moliya vaziri Jamshid Qo‘chqorov ma’lum qildi, deb xabar beradi “Gazeta.uz” muxbiri.
“Bular juda ham yuqori ko‘rsatkichlar. [Yashirin iqtisodiyot] eng yuqori darajaga ega bo‘lgan hududlar haqida gapiradigan bo‘lsak, bu qurilish, savdo va xizmatlar ko‘rsatish sohalari”, — dedi u.
Uning so‘zlariga ko‘ra, norasmiy iqtisodiyotni oqlash uchun Prezident administratsiyasi bilan birgalikda prezident qarori loyihasi tayyorlandi va u yakuniy tasdiqlash bosqichida.
“Unda bir qancha yo‘nalishlar, jumladan, naqd pul aylanmasini kamaytirish ko‘zda tutilgan. Bu eski ma’noda emas. Ayrim to‘lovlarni faqat bank kartalari orqali to‘lash va boshqa masalalar bor”, — dedi Jamshid Qo‘chqorov.
Hujjat hali qabul qilinmagani uchun barcha chora-tadbirlarni sanab o‘tmasligini aytib, qarorni yashirin iqtisodiyot masalasini so‘ragan Senat raisi Tanzila Narboyevaga tasdiqlangach, Senat qo‘mitasiga yuborishni taklif qildi.
Senat raisining so‘zlariga ko‘ra, hujjatda boshqa tashkilotlar, jumladan, Savdo-sanoat palatasi uchun ham yashirin iqtisodiyot ulushini kamaytirish bo‘yicha tavsiyalar belgilanishi kerak. “Bu yerda nafaqat davlat organlarining ishi, ham jamoatchilik, ham tadbirkorlarning o‘zlari ishtirok etishi muhim o‘rin tutadi”, — dedi u.
O‘zLiDeP partiyasining oktabr oyida bo‘lib o‘tgan yig‘ilishida ekspertlar O‘zbekiston yashirin iqtisodiyotining yillik hajmini 32 milliard dollar (mamlakat yalpi ichki mahsulotining qariyb 40 foizi) deb baholayotgani ma’lum qilingan edi. Ushbu miqdorning asosiy tarkibiy qismlari uy-joy va transport vositalarining ikkilamchi bozori, norasmiy savdo va xizmatlar, shuningdek, qishloq xo‘jaligi kabi sohalar bo‘ldi. Shuningdek, kontrabanda va tovarlarning ruxsatsiz aylanishining roli qayd etildi.
