Jahongir Davlatovich Aminov O‘zbekistonning Isroildagi yangi elchisi bo‘ldi. Bu haqda X.com (avvalgi Twitter)da Isroilning Toshkentdagi elchisi Zexavit Ben-Gilel xabar berdi.
U Jahongir Aminovga muvaffaqiyatlar tiladi va Isroildagi avvalgi tajribasi ikki davlat o‘rtasidagi munosabatlarni mustahkamlashga yordam berishini ta’kidladi.
Jahongir Aminov 2019-yil oktabr oyidan buyon Tashqi ishlar vazirligi Tashqi iqtisodiy hamkorlik bosh boshqarmasining Xorijiy investitsiyalarni jalb qilish va moliyaviy-texnik ko‘maklashish boshqarmasi boshlig‘i lavozimida ishlab kelayotgandi. Undan avval TIVning MDH davlatlari bilan hamkorlik boshqarmasi boshlig‘i lavozimida faoliyat yuritgan.
Eslatib o‘tamiz, 2020-yildan buyon O‘zbekistonning Isroildagi elchisi lavozimida ishlab kelgan Feruza Mahmudova o‘z missiyasini yakunlagani haqida xabar berilgandi.
