“O‘zagroeksportbank” aksiyadorlari bank nomini o‘zgartirish va rebrending o‘tkazilishini ma’qulladi. 10-avgust kuni bo‘lib o‘tgan aksiyadorlar yig‘ilishi yakunlari bo‘yicha bank qarorida bu haqda so‘z boradi.
Kredit tashkilotining nomi AVO Bank`ga o‘zgartirildi. Bundan tashqari, bankning e’lon qilingan har birining qiymati 20 so‘mdan bo‘lgan oddiy aksiyalarining maksimal miqdori 200 mlrd donagacha oshirildi.
Bankning avvalgi brendi.
Bank AVO Services and Technology IT-kompaniyasi bilan birgalikda AVO kompaniyalar guruhi tarkibiga kiradi. AVO nomi — “havo” so‘zining qisqartmasi hisoblanadi. “Havo vaznsiz, hamma joyda va toza bo‘lganidek, bizning moliyaviy xizmatlarimiz ham har kuni ochiq, tushunarli va ulardan foydalanish oson”, — deyiladi kompaniya bayonotida.
Hisobotda qayd etilishicha, kompaniya “O‘zbekistonda yetakchi chakana bank”ni yaratmoqda.
“Ilg‘or texnologiyalar, bank litsenziyalari va butun dunyo bo‘ylab (Hindiston, Singapur, Meksika, Indoneziya, O‘zbekiston va boshqalar) muvaffaqiyatli bank va FinTech-loyihalarini yaratish bo‘yicha katta tajribaga ega bo‘lgan holda moliyaviy xizmatlardan foydalanishning raqamlashtirilgan tajribasiga butunlay o‘tish yo‘lida mijozlarga mamlakat bozori uchun zamonaviy va noyob bo‘lgan, nafaqat to‘liq o‘z-o‘ziga xizmat qilishni ta’minlovchi bank mobil ilovasi, balki mijozlarni o‘qitishni ham qo‘llab-quvvatlovchi mijozlarga samarali xizmatni o‘z ichiga oladigan „assisted self-service“ foydalanuvchi tajribasini amalga tatbiq etishning uddasidan chiqdik”, — deya ma’lum qildi kompaniya.
“O‘zagroeksportbank”ning xususiylashtirilishi
“O‘zagroeksportbank” aksiyadorlik tijorat O‘zbekiston prezidentining 2017-yil 24-yanvardagi qarori bilan tashkil etilgan. Bankni tashkil etishdan maqsad qishloq xo‘jaligi ishlab chiqaruvchilari va aholi uchun qulay shart-sharoitlar yaratish, eksport qiluvchi tashkilotlarni moliyaviy qo‘llab-quvvatlash hamda meva-sabzavot mahsulotlarini eksport qilish salohiyatini rivojlantirishdan iborat ekanligi e’lon qilindi.
2021-yil may oyida bank sotuvga qo‘yildi. 2022-yil fevralida “O‘zagroeksportbank” Rossiyaning “Sovkombank”i tomonidan 4 mln dollarga sotib olindi, biroq AQSh sanksiyalari tufayli o‘sha yilning yozida bitim bekor qilindi.
2022-yil oktabr oyi oxirida “Gazeta.uz” davlat aksiyalari paketini hukumatning yopiq qarori bo‘yicha investitsiya majburiyatlarini bajarish sharti bilan (hujjat “xizmat foydalanish uchun” deb tasniflangan) Support Level kompaniyasiga o‘tkazish rejalashtirilayotgani haqida yozdi.
“O‘zagroeksportbank” va “Poytaxtbank” aksiyalarining davlat ulushini sotish rejalarini e’lon qilishda Davlat aktivlarini boshqarish agentligi quyidagi mezonlarni belgiladi: ROE (xususiy kapitali rentabelligi) indeksi kamida 10 foiz bo‘lishi, tasdiqlangan kompetensiya va bank boshqaruvi bo‘yicha tajriba, ustav kapitali va kredit reytingining mavjudligi va boshqa ko‘plab talablar.
Yanvar oyi boshida Support Level “O‘zagroeksportbank”ni tendersiz 5 mln dollarga sotib olgani va bir qator majburiyatlarni o‘z zimmasiga olgani ma’lum bo‘ldi. Keyinchalik kompaniya o‘z nomini Avo.uz ga o‘zgartirdi.
KTYADR ma’lumotlariga ko‘ra, ushbu kompaniya 2015-yil avgust oyida Toshkent shahrida ro‘yxatdan o‘tgan. Asosiy faoliyat — xodimlar bilan ishlash. 2022-yil 18-oktabr holatiga ko‘ra kompaniyaning ustav kapitali 6 mln so‘mni tashkil etgan bo‘lsa, 28-oktabrda 56 mlrd so‘mga, keyin esa 91,3 mlrd so‘mga o‘sdi.
1-iyun holatiga bankning ustav kapitali 105,1 mlrd so‘mni tashkil etmoqda. Yil boshidan buyon aktivlar 49 mlrd so‘mdan 63 mlrd so‘mga, majburiyatlar esa 2 mlrd so‘mdan 3 mlrd so‘mga ko‘paydi.
Avo.uz rahbari — Iskander Imamaliyevich Usmonov, yagona asoschisi — Olimjon Qosimovich Shodiyev.
Olimjon Shodiyev O‘zbekistondagi eng yirik kompaniya — Navoiy kon-metallurgiya kombinati kuzatuv kengashi raisi o‘rinbosari edi, keyinroq uni tark etdi. Shuningdek, u Qozog‘iston va boshqa mamlakatlar moliya bozorlarida faoliyat yurituvchi “IFG Kontinent” investitsiya kompaniyalari guruhining affillangan shaxslar qatoriga kiritilgan.
“Yevroosiyo banki” obligatsiyalari chiqarilishi prospektida Olimjon Shodiyev bankning affillangan shaxs sifatida Izarus Investment B.V. (Lyuksemburg) rahbari sifatida ko‘rsatilgan. Hujjatda milliarder Fattoh Shodiyev oilasining boshqa a’zolari, jumladan uning ukasi Qosim Shodiyev ham ko‘rsatilgan.
