«Ўзагроэкспортбанк» акциядорлари банк номини ўзгартириш ва ребрендинг ўтказилишини маъқуллади. 10 август куни бўлиб ўтган акциядорлар йиғилиши якунлари бўйича банк қарорида бу ҳақда сўз боради.
Кредит ташкилотининг номи AVO Bank`га ўзгартирилди. Бундан ташқари, банкнинг эълон қилинган ҳар бирининг қиймати 20 сўмдан бўлган оддий акцияларининг максимал миқдори 200 млрд донагача оширилди.
Банкнинг аввалги бренди.
Банк AVO Services and Technology IT-компанияси билан биргаликда AVO компаниялар гуруҳи таркибига киради. AVO номи — «ҳаво» сўзининг қисқартмаси ҳисобланади. «Ҳаво вазнсиз, ҳамма жойда ва тоза бўлганидек, бизнинг молиявий хизматларимиз ҳам ҳар куни очиқ, тушунарли ва улардан фойдаланиш осон», — дейилади компания баёнотида.
Ҳисоботда қайд этилишича, компания «Ўзбекистонда етакчи чакана банк»ни яратмоқда.
«Илғор технологиялар, банк лицензиялари ва бутун дунё бўйлаб (Ҳиндистон, Сингапур, Мексика, Индонезия, Ўзбекистон ва бошқалар) муваффақиятли банк ва FinTech-лойиҳаларини яратиш бўйича катта тажрибага эга бўлган ҳолда молиявий хизматлардан фойдаланишнинг рақамлаштирилган тажрибасига бутунлай ўтиш йўлида мижозларга мамлакат бозори учун замонавий ва ноёб бўлган, нафақат тўлиқ ўз-ўзига хизмат қилишни таъминловчи банк мобил иловаси, балки мижозларни ўқитишни ҳам қўллаб-қувватловчи мижозларга самарали хизматни ўз ичига оладиган „assisted self-service“ фойдаланувчи тажрибасини амалга татбиқ этишнинг уддасидан чиқдик», — дея маълум қилди компания.
«Ўзагроэкспортбанк»нинг хусусийлаштирилиши
«Ўзагроэкспортбанк» акциядорлик тижорат Ўзбекистон президентининг 2017 йил 24 январдаги қарори билан ташкил этилган. Банкни ташкил этишдан мақсад қишлоқ хўжалиги ишлаб чиқарувчилари ва аҳоли учун қулай шарт-шароитлар яратиш, экспорт қилувчи ташкилотларни молиявий қўллаб-қувватлаш ҳамда мева-сабзавот маҳсулотларини экспорт қилиш салоҳиятини ривожлантиришдан иборат эканлиги эълон қилинди.
2021 йил май ойида банк сотувга қўйилди. 2022 йил февралида «Ўзагроэкспортбанк» Россиянинг «Совкомбанк»и томонидан 4 млн долларга сотиб олинди, бироқ АҚШ санкциялари туфайли ўша йилнинг ёзида битим бекор қилинди.
2022 йил октябрь ойи охирида «Газета.uz» давлат акциялари пакетини ҳукуматнинг ёпиқ қарори бўйича инвестиция мажбуриятларини бажариш шарти билан (ҳужжат «хизмат фойдаланиш учун» деб таснифланган) Support Level компаниясига ўтказиш режалаштирилаётгани ҳақида ёзди.
«Ўзагроэкспортбанк» ва «Пойтахтбанк» акцияларининг давлат улушини сотиш режаларини эълон қилишда Давлат активларини бошқариш агентлиги қуйидаги мезонларни белгилади: ROE (хусусий капитали рентабеллиги) индекси камида 10 фоиз бўлиши, тасдиқланган компетенция ва банк бошқаруви бўйича тажриба, устав капитали ва кредит рейтингининг мавжудлиги ва бошқа кўплаб талаблар.
Январь ойи бошида Support Level «Ўзагроэкспортбанк»ни тендерсиз 5 млн долларга сотиб олгани ва бир қатор мажбуриятларни ўз зиммасига олгани маълум бўлди. Кейинчалик компания ўз номини Avo.uz га ўзгартирди.
КТЯДР маълумотларига кўра, ушбу компания 2015 йил август ойида Тошкент шаҳрида рўйхатдан ўтган. Асосий фаолият — ходимлар билан ишлаш. 2022 йил 18 октябрь ҳолатига кўра компаниянинг устав капитали 6 млн сўмни ташкил этган бўлса, 28 октябрда 56 млрд сўмга, кейин эса 91,3 млрд сўмга ўсди.
1 июнь ҳолатига банкнинг устав капитали 105,1 млрд сўмни ташкил этмоқда. Йил бошидан буён активлар 49 млрд сўмдан 63 млрд сўмга, мажбуриятлар эса 2 млрд сўмдан 3 млрд сўмга кўпайди.
Avo.uz раҳбари — Искандер Имамалиевич Усмонов, ягона асосчиси — Олимжон Қосимович Шодиев.
Олимжон Шодиев Ўзбекистондаги энг йирик компания — Навоий кон-металлургия комбинати кузатув кенгаши раиси ўринбосари эди, кейинроқ уни тарк этди. Шунингдек, у Қозоғистон ва бошқа мамлакатлар молия бозорларида фаолият юритувчи «ИФГ Континент» инвестиция компаниялари гуруҳининг аффилланган шахслар қаторига киритилган.
«Евроосиё банки» облигациялари чиқарилиши проспектида Олимжон Шодиев банкнинг аффилланган шахс сифатида Izarus Investment B.V. (Люксембург) раҳбари сифатида кўрсатилган. Ҳужжатда миллиардер Фаттоҳ Шодиев оиласининг бошқа аъзолари, жумладан унинг укаси Қосим Шодиев ҳам кўрсатилган.
