9-avgust kuni 2019-yilda Qibray tumanida 13 yoshli qizning zo‘rlanishi bo‘yicha jinoyat ishi Jinoyat ishlari bo‘yicha Toshkent viloyati Bo‘stonliq tuman sudiga o‘tkazildi. Bu haqda O‘zbekiston Oliy sudi matbuot xizmati xabar berdi.
“Gazeta.uz” qizning AQShda yashovchi oilasi ishni sudga yetkazish uchun ko‘p kuch sarflagani, ko‘plab to‘siqlar va hatto tahdidlarga duch kelgani haqida yozgan edi.
Gumonlanuvchi Sh. Sh.(1993-yilda tug‘ilgan) jinoyat sodir etgan vaqtda 27 yoshda, ishsiz bo‘lgan, keyinchalik Milliy gvardiyaning tuman qo‘riqlash bo‘limida oddiy askar sifatida xizmatga kirgan.
U Jinoyat kodeksining 118-moddasi 4-qismi — 14 yoshga to‘lmagan shaxsni zo‘rlashda ayblanmoqda. Buning uchun unga 15 yildan 20 yilgacha qamoq jazosi tayinlanishi mumkin.
Jinoyat ishlari bo‘yicha Nurafshon shahar sudining 29 iyuldagi qarori bilan ushbu shaxs qamoqqa olingan.
Nomusga tegish bilan bog‘liq huquqbuzarlik to‘g‘risidagi ish ko‘rib chiqilayotgani munosabati bilan Jinoyat-protsessual kodeksining 19-moddasida nazarda tutilganidek, sud majlisi yopiq eshiklar ortida o‘tkaziladi.
Qizning ota-onasi Nemolchi.uz zo‘ravonlikka qarshi loyihasiga: “Jinoyat ishi yopildi, da’vo muddati o‘tgan, hech qanday dalil yo‘q, deyishdi. Ish Qibray tuman prokuraturasi, Harbiy prokuratura, Respublika prokuraturasiga o‘tkazildi va natija bo‘lmadi. Senatorlarga ham, bolalar ombudsmaniga ham murojaat qilindi. Hammasi behuda”, — degan edi.
Nemolchi.uz aprel oyida jinoyat haqida e’lon qilganidan so‘ng, bu haqda internet nashrlari yozdi. Shundan keyingina jinoiy ish qayta qo‘zg‘atilgan. Batafsil ma’lumotlarni aprel oyidagi maqolamizda o‘qing.
