Dushanba kuni Senatning 27-yalpi majlisida «Alkogol va tamaki mahsulotlarining tarqatilishini hamda iste’mol qilinishini cheklash to‘g‘risida»gi qonun rad etildi. Senator Odiljon Iminov uning asosiy tushunchalarini oydinlashtirish zarurligini, ziddiyatli normalar mavjudligi va huquqni qo‘llash amaliyoti chuqur o‘rganilmaganini ta’kidladi.
Senat fevral oyida Qonunchilik palatasi tomonidan 2021 yil oxirida qabul qilingan «Alkogol va tamaki mahsulotlarining tarqatilishini hamda iste’mol qilinishini cheklash to‘g‘risida»gi qonunni dastlabki tarzda muhokama qildi. U 2011 yilda qabul qilingan amaldagi qonun va «Jamoat joylarida chilim va elektron sigaretalar chekishni cheklash to‘g‘risida»gi qonun o‘rnini egallashi kerak.
Odiljon Iminov.
Qonunda 21 yoshgacha bo‘lgan yoshlarni tamaki mahsulotlarining zararli ta’siridan himoya qilish, jamiyatda sog‘lom turmush tarzini targ‘ib qilish bo‘yicha yangi standartlar belgilandi. Xususan, O‘zbekistonga chekilmaydigan tamaki mahsulotlari, jumladan, tarkibida nikotin bo‘lgan chekish mumkin bo‘lmagan mahsulotlarni olib kirish va sotish taqiqlanadi.
Odiljon Iminov qonundagi ayrim kamchiliklarga to‘xtalib o‘tdi, xususan: qonunda alkogol va tamaki mahsulotlarini iste’mol qilishning zarari haqida faqat voyaga yetmaganlar o‘rtasida targ‘ibot va tashviqot ishlari olib borilishi hamda 21 yoshga to‘lmagan shaxslarga bunday mahsulotlarni sotish va iste’mol qilish taqiqlanishi belgilangan. Natijada 18−21 yoshlilar tarbiyaviy ishlardan chetda qolayotgani ma’lum bo‘ldi.
Shuningdek, qonunda «nosvoy», «tamakili snyus» va «nikotinli snyus» tushunchalari chekilmaydigan tamaki mahsulotlari doirasiga kiritilgan. Bunda «nosvoy» tushunchasining mazmuni alohida xatboshida ochib berilgan, biroq boshqa yangi turdagi chekilmaydigan tamaki mahsulotlari «tamakili snyus» va «nikotinli snyus» tushunchalari ochib berilmagan, ularning bir-biridan farqi bayon etilmagan.
Qonun muhokamasi. Foto: Senat matbuot xizmati
Bundan tashqari, 7 iyunda qabul qilingan «Reklama to‘g‘risida»gi yangi qonunga muvofiq mahalliy pivo reklamasiga ruxsat beruvchi holatlar to‘g‘risidagi qonun qoidalari qonunga kiritilmagan, bu esa mahalliy vinolar reklamasi bilan bir qatorda mahalliy pivoning cheklangan reklamasiga ruxsat bergan.
Shu asosda Senat qonunni rad etishga qaror qildi. Qonunning ahamiyati va dolzarbligini inobatga olib, ushbu kamchiliklar Qonunchilik palatasi tomonidan ko‘rib chiqilgandan so‘ng uni Senatning navbatdagi yalpi majlisi kun tartibiga qaytadan kiritish to‘g‘risida qaror qabul qilindi.
