Душанба куни Сенатнинг 27-ялпи мажлисида «Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида»ги қонун рад этилди. Сенатор Одилжон Иминов унинг асосий тушунчаларини ойдинлаштириш зарурлигини, зиддиятли нормалар мавжудлиги ва ҳуқуқни қўллаш амалиёти чуқур ўрганилмаганини таъкидлади.
Сенат февраль ойида Қонунчилик палатаси томонидан 2021 йил охирида қабул қилинган «Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида»ги қонунни дастлабки тарзда муҳокама қилди. У 2011 йилда қабул қилинган амалдаги қонун ва «Жамоат жойларида чилим ва электрон сигареталар чекишни чеклаш тўғрисида»ги қонун ўрнини эгаллаши керак.
Одилжон Иминов.
Қонунда 21 ёшгача бўлган ёшларни тамаки маҳсулотларининг зарарли таъсиридан ҳимоя қилиш, жамиятда соғлом турмуш тарзини тарғиб қилиш бўйича янги стандартлар белгиланди. Хусусан, Ўзбекистонга чекилмайдиган тамаки маҳсулотлари, жумладан, таркибида никотин бўлган чекиш мумкин бўлмаган маҳсулотларни олиб кириш ва сотиш тақиқланади.
Одилжон Иминов қонундаги айрим камчиликларга тўхталиб ўтди, хусусан: қонунда алкоголь ва тамаки маҳсулотларини истеъмол қилишнинг зарари ҳақида фақат вояга етмаганлар ўртасида тарғибот ва ташвиқот ишлари олиб борилиши ҳамда 21 ёшга тўлмаган шахсларга бундай маҳсулотларни сотиш ва истеъмол қилиш тақиқланиши белгиланган. Натижада 18−21 ёшлилар тарбиявий ишлардан четда қолаётгани маълум бўлди.
Шунингдек, қонунда «носвой», «тамакили снюс» ва «никотинли снюс» тушунчалари чекилмайдиган тамаки маҳсулотлари доирасига киритилган. Бунда «носвой» тушунчасининг мазмуни алоҳида хатбошида очиб берилган, бироқ бошқа янги турдаги чекилмайдиган тамаки маҳсулотлари «тамакили снюс» ва «никотинли снюс» тушунчалари очиб берилмаган, уларнинг бир-биридан фарқи баён этилмаган.
Қонун муҳокамаси. Фото: Сенат матбуот хизмати
Бундан ташқари, 7 июнда қабул қилинган «Реклама тўғрисида»ги янги қонунга мувофиқ маҳаллий пиво рекламасига рухсат берувчи ҳолатлар тўғрисидаги қонун қоидалари қонунга киритилмаган, бу эса маҳаллий винолар рекламаси билан бир қаторда маҳаллий пивонинг чекланган рекламасига рухсат берган.
Шу асосда Сенат қонунни рад этишга қарор қилди. Қонуннинг аҳамияти ва долзарблигини инобатга олиб, ушбу камчиликлар Қонунчилик палатаси томонидан кўриб чиқилгандан сўнг уни Сенатнинг навбатдаги ялпи мажлиси кун тартибига қайтадан киритиш тўғрисида қарор қабул қилинди.
