Sportchilar manfaatlarini himoya qilish maqsadida O‘zbekiston Milliy olimpiya qo‘mitasi qoshida Atletlar komissiyasi tuzildi, deb xabar berdi MOQ matbuot xizmati.
Sportchilar komissiyasi saylangan organ bo‘lib, sportchilar va MOQ o‘rtasida aloqa o‘rnatuvchi vazifasini bajaradi, deyiladi bayonotda. Sportchilar mamlakat olimpiya harakatini rivojlantirish bo‘yicha o‘zlari qaror qabul qiladi va sportchilarning nuqtai nazari ustuvorligini ta’minlaydi.
Anonim ovoz berish natijalariga ko‘ra, komissiya tarkibiga Oksana Chusovitina (badiiy gimnastika), Rishod Sobirov (dzyudo), Dmitriy Shokin (taekvondo), Bekzod Abdurahmonov (erkin kurash), Zaynab Daiibekova (qilichbozlik), Svetlana Radzivil (yengil atletika) va Komiljon To‘xtayev (chang‘i uchish) kiritilgan.
Komissiya a’zolari o‘zaro kelishuv asosida tarkibni aniqlab bo‘lgach, rahbar va uning o‘rinbosarlarini sayladi. Komissiya rahbari Dmitriy Shokin, Oksana Chusovitina va Bekzod Abdurahmonov uning o‘rinbosarlari bo‘ldi.
Komissiya tarkibiga saylangan sportchilar MOQ umumiy yig‘ilishi va ijroiya qo‘mitasi ishida qatnashish huquqiga ega. MOQ Ijroiya qo‘mitasi yig‘ilishlarida komissiya a’zosi Zaynab Daiibekova, Bosh Assambleyada esa Svetlana Radzivil va Komiljon To‘xtayev ishtirok etadi.
«Komissiya faoliyatini sifatli va samarali amalga oshirish uchun bizni katta mas’uliyatli ishlar kutmoqda. Sportchilar komissiyasi vakili lavozimi Olimpiya harakatining barcha darajadagi har bir qarorida sportchilarning fikrlari va manfaatlarini ifodalash uchun ham zarurdir. Birlashgan sa’y-harakatlar bilan mavjud qiyinchiliklarni yengib, oldimizga qo‘yilgan maqsad va vazifalarga erishamiz, deb ishonamiz», — dedi MOQ bosh kotibi Oybek Qosimov.
