18 mart kuni kechqurun soat 20:45 da Yashnobod tumanidagi motor moy mahsulotlari (bochkalarda) omborida yong‘in chiqdi, deb xabar berdi FVV.
Voqea Farg‘ona yo‘li ko‘chasida joylashgan «Orient Logistics Center» qo‘shma korxonasi hududidagi omborxonada yuz bergan. U yerga 10 ta yong‘in-qutqaruv ekipaji, 3 ta maxsus va 2 ta yordamchi texnikalar zudlik yetib borgan.
Yong‘in soat 21:49 da qurshab olingan va 19 mart soat 03:30 da bartaraf etilgan. Voqea natijasida omborxonaning taxminan 2000 kv. m maydonida moy mahsulotlari yonib zararlangan.
Hodisa oqibatida hech kim tan jarohati olmagan, vafot etganlar yo‘q. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.
