Milliy gvardiya yetim va ota-ona qaramog‘isiz qolgan bolalarni tarbiyalashning yangilangan tizimini joriy etish bo‘yicha olib borilgan ishlar yakunlari haqida ma’lum qildi.
Eslatib o‘tamiz, prezidentning avgustdagi qarori bilan Sog‘liqni saqlash vazirligi tizimidagi Mehribonlik uylari, bolalar shaharchalari, oilaviy namunadagi Mehribonlik uylari Milliy gvardiyaga o‘tkazilgan edi. Huquqni muhofaza qiluvchi organga muassasa tarbiyalanuvchilarini ota-onalariga qaytarish, ularga vasiy tayinlash va bolalarni asrab olishda ko‘maklashish topshirildi. 2020 yilda «Gazeta.uz» kolumnisti Dilmurod Yusupov va bolalar ombudsmani Aliya Yunusova mehribonlik uylarini deinstitutsionalizatsiya qilish va yopish zarurligi haqida yozgan edi.
Milliy gvardiya matbuot xizmati xabariga ko‘ra, qaror chiqarilgan vaqtda (2021 yil 9 avgust) O‘zbekistonda 16 ta Mehribonlik uyi va 4 ta bolalar shaharchasi faoliyat ko‘rsatgan.
To‘rt oy ichida Qoraqalpog‘iston, Buxoro, Qashqadaryo, Navoiy, Namangan, Surxondaryo va Farg‘ona viloyatlaridagi 7 ta Mehribonlik uyi yopildi. Xorazm, Navoiy va Sirdaryo viloyatlaridagi bolalar shaharchalari ham faoliyatini to‘xtatdi.
Bugungi kunda 1184 nafar bola oilalarda tarbiyalanmoqda — ular asrab olingan, vasiylikka olingan yoki yaqin qarindoshlari tomonidan oilasiga qabul qilingan. Bundan tashqari, bolalar bugungi kunda butun mamlakat bo‘ylab tashkil etilgan 97 ta oilaviy mehribonlik uylarida tarbiyalanmoqda.
Eslatib o‘tamiz, oilaviy mehribonlik uylari, shuningdek, vasiylik va homiylik ostidagi va oilada o‘qish uchun 25 yoshgacha bo‘lgan yetim bolalar uchun Milliy gvardiyaning harbiy xizmatchilari va xodimlari oyiga kamida bir marta bolalar bilan suhbatlashishlari hamda ularning qanday ta’lim va tarbiya olayotganlari, qanday sharoitda yashayotganlarini o‘rganishlari lozim.
Oilaviy mehribonlik uylari ochilishi va Milliy gvardiya tomonidan qanday ishlar amalga oshirilayotgani haqida batafsil ma’lumotni Mehribonlik.uz saytidan olish mumkin.
