Миллий гвардия етим ва ота-она қарамоғисиз қолган болаларни тарбиялашнинг янгиланган тизимини жорий этиш бўйича олиб борилган ишлар якунлари ҳақида маълум қилди.
Эслатиб ўтамиз, президентнинг августдаги қарори билан Соғлиқни сақлаш вазирлиги тизимидаги Меҳрибонлик уйлари, болалар шаҳарчалари, оилавий намунадаги Меҳрибонлик уйлари Миллий гвардияга ўтказилган эди. Ҳуқуқни муҳофаза қилувчи органга муассаса тарбияланувчиларини ота-оналарига қайтариш, уларга васий тайинлаш ва болаларни асраб олишда кўмаклашиш топширилди. 2020 йилда «Газета.uz» колумнисти Дилмурод Юсупов ва болалар омбудсмани Алия Юнусова меҳрибонлик уйларини деинституционализация қилиш ва ёпиш зарурлиги ҳақида ёзган эди.
Миллий гвардия матбуот хизмати хабарига кўра, қарор чиқарилган вақтда (2021 йил 9 август) Ўзбекистонда 16 та Меҳрибонлик уйи ва 4 та болалар шаҳарчаси фаолият кўрсатган.
Тўрт ой ичида Қорақалпоғистон, Бухоро, Қашқадарё, Навоий, Наманган, Сурхондарё ва Фарғона вилоятларидаги 7 та Меҳрибонлик уйи ёпилди. Хоразм, Навоий ва Сирдарё вилоятларидаги болалар шаҳарчалари ҳам фаолиятини тўхтатди.
Бугунги кунда 1184 нафар бола оилаларда тарбияланмоқда — улар асраб олинган, васийликка олинган ёки яқин қариндошлари томонидан оиласига қабул қилинган. Бундан ташқари, болалар бугунги кунда бутун мамлакат бўйлаб ташкил этилган 97 та оилавий меҳрибонлик уйларида тарбияланмоқда.
Эслатиб ўтамиз, оилавий меҳрибонлик уйлари, шунингдек, васийлик ва ҳомийлик остидаги ва оилада ўқиш учун 25 ёшгача бўлган етим болалар учун Миллий гвардиянинг ҳарбий хизматчилари ва ходимлари ойига камида бир марта болалар билан суҳбатлашишлари ҳамда уларнинг қандай таълим ва тарбия олаётганлари, қандай шароитда яшаётганларини ўрганишлари лозим.
Оилавий меҳрибонлик уйлари очилиши ва Миллий гвардия томонидан қандай ишлар амалга оширилаётгани ҳақида батафсил маълумотни Mehribonlik.uz сайтидан олиш мумкин.
