Loyihalashtirilayotgan Toshkent-Samarqand va Toshkent-Andijon pullik yo‘llaridan o‘tish narxi 5−6 dollar (ekvivalentda) atrofida bo‘lishi kutilmoqda. Bu haqda Davlat-xususiy sheriklikni rivojlantirish agentligi vakili O‘zLiDeP press-klubida ma’lum qildi.
Uning so‘zlariga ko‘ra, Toshkentdan Farg‘ona vodiysiga borish yo‘lining narxi uch qismga bo‘linadi (dastlabki hisob-kitoblarga ko‘ra):
- Toshkent-Angren — 1,7 dollar;
- Angren-Qo‘qon — 2 dollar;
- Qo‘qon-Andijon — 1,6 dollar.
Yuk transporti uchun narx qimmatroq bo‘ladi. Misol uchun, Toshkentdan Andijongacha bo‘lgan yo‘l yuk mashinalari uchun 20 dollarga tushishi mumkin.
Pullik yo‘llarda harakatlanishning maksimal tezligi 120−150 km/s bo‘lishi mumkin, deydi agentlik vakili. Ayrim tog‘li hududlarda bu 60−70 km/sga teng bo‘lishi mumkin.
Eslatib o‘tamiz, hozirda O‘zbekiston avtoyo‘llarida harakatlanishning ruxsat berilgan tezligi alohida yo‘l qismlarida o‘rnatilgan belgilarga muvofiq 110 km/s (YHQga ko‘ra — 100 km/s).
2018 yilning oxirida qabul qilingan Vazirlar mahkamasi qaroriga ko‘ra, 2020 yilning 1 yanvaridan boshlab O‘zbekistonda pullik yo‘llarni DXSH asosida joriy qilish nazarda tutilgan edi.
Bir yil o‘tib, sobiq transport vaziri El’yor Ganiyev Toshkent-Samarqand pullik trassasining qurilishi yo‘nalishning investor tomonidan ko‘rsatilgan narxi qimmatligi sababli kechikayotganligini ma’lum qilgan edi.
