“103” avtomatlashtirilgan boshqaruv tizimida faol ishlagan tez tibbiy yordam podstansiyalarini taqdirlash marosimida sog‘liqni saqlash vaziri o‘rinbosari Abdulla Azizov yil davomida 10 mlndan ortiq murojaatlar kelib tushganini ma’lum qilgan. Bu haqda Sog‘liqni saqlash vazirligi jamoatchilik bilan aloqalar bo‘limi xabar bermoqda.
“Bu yil shoshilinch tibbiy yordam xodimlari uchun ancha sertashvish yil keldi, desak, adashmaymiz. Joriy yilda „103“ tez tibbiy yordam raqamiga 10 milliondan oshiq murojaatlar kelib tushgan. Shundan 800 mingdan ortig‘i Toshkent shahri hissasiga to‘g‘ri kelmoqda”, — dedi Azizov.
Bundan tashqari, tez tibbiy yordam tizimi faoliyatini samarali yo‘lga qo‘yish maqsadida Sog‘liqni saqlash vazirligi, Respublika shoshilinch tibbiy yordam ilmiy markazi dasturchilar markazi bilan hamkorlik loyihasiga qo‘l urilgani aytilmoqda.
Loyihani Jahon banki moliyalashtirgan. “Tez tibbiy yordam xizmati faoliyatida zamonaviy axborot-kommunikatsiya texnologiyalarini joriy etish” maqsadida qo‘ng‘iroqlarni qabul qilish va qayta ishlashni avtomatlashtirish, ma’lumot almashish va tez tibbiy yordam brigadalarini boshqarish bo‘yicha shoshilinch tibbiy yordamning markazlashtirilgan axborot tizimi kursi tematik takomillashtirish bo‘yicha o‘qitish o‘tkazildi va kurslarni tamomlagan mutaxassislarga sertifikatlar topshirish marosimi bo‘lib o‘tdi.
Shuningdek, Sog‘liqni saqlash vazirligining tashabbusi va dasturchilar markazi ishtirokida “103” avtomatlashtirilgan boshqaruv tizimida faol ishlagan tez tibbiy yordam podstansiyalari taqdirlandi.
Hozirda Toshkent shahar tez tibbiy yordam xizmati tomonidan “103” avtomatlashtirilgan boshqaruv tizimi uchun quyidagilarni ta’minlashga imkon beradigan dasturiy apparat kompleks joriy etilgan:
- Qo‘ng‘iroqlarni qabul qilish, xizmat ko‘rsatish va ro‘yxatdan o‘tkazishni boshqarishning samarali mexanizmi;
- Tez tibbiy yordam avtomashilarini boshqarishni nazorat qilish, monitoring qilish va optimallashtirish;
- Dispetcherlik xizmatini real vaqtda boshqarish, tahlil, ma’lumotnoma va hisobotlarni avtomatik yaratish;
- Yagona ma’lumotlar bazasi shakllantirish;
- Qo‘ng‘iroqlarni tezkor ro‘yxatdan o‘tkazish va bemor haqida ma’lumot olish;
- Hisobot hujjatlarini yaratish, ko‘rish kabi imkoniyatlar yaratildi.
Vazir o‘rinbosarining aytishicha, bir marotaba olingan ma’lumotlar tizimda elektron tarzda brigadaga to‘g‘ridan-to‘g‘ri uzatiladi va bu bilan vaqt tejalishiga erishiladi. Bu tizim o‘rnatilishidan avval esa chaqiriq xaqidagi barcha ma’lumotlar avval dispetcher tomonidan qog‘ozga tushirib olinar edi. Shundan so‘ng, telefon orqali brigadalarni yo‘naltiruvchi ikkinchi dispetcherga aytilib, u ham qog‘ozga yuqoridagi ma’lumotlarni qayta tushirib, brigadaga shu ikkinchi marta to‘ldirilgan qog‘oz bilan xabar uzatar edi.
Qolaversa, yangi tizim orqali chaqiriqdan bo‘sh bo‘lgan va chaqiriq manziliga eng yaqin bo‘lgan tez tibbiy yordam brigadasiga xabar uzatish imkoni yaratilgan va ularning harakati onlayn kuzatib boriladi.
