Vazirlar Mahkamasining 2018 yil 18 sentyabrdagi «Aholini farmatsevtika mahsulotlari bilan ta’minlash tizimini yanada takomillashtirish chora-tadbirlari to‘g‘risida» 738-son qarori qabul qilindi. Bu haqda Norma.uz xabar tarqatdi.
Hukumat mamlakatimiz farmatsevtika bozorining asosiy muammolarini belgiladi. Hisobga olish va hisobotning eskirgan (qog‘oz shakli) tizimi, majburiy identifikatsiyalashning mavjud emasligi, chekka tumanlarda infratuzilmaning rivojlanmaganligi va farmatsevtika mahsulotlar harakatini davlat tomonidan nazorat qilishning mavjud emasligi shular jumlasidandir.
2019 yil 1 iyuldan joriy etiladigan farmatsevtika mahsulotlari harakatini nazorat qilish va hisobga olishning axborot tizimi:
mamlakatimiz hududida realizatsiya qilinadigan farmatsevtika mahsulotlari haqida batafsil axborot, bozor ishtirokchilari (ishlab chiqaruvchidan iste’molchigacha) va mahsulotlar: turi, nomi, ishlab chiqarish hajmi va boshqalar to‘g‘risidagi ma’lumotlarni yig‘ishni ta’minlaydi;
ko‘rsatilgan mahsulotlarni maxsus markalashning tarkibiy qismlarini ishlab chiqish, shuningdek ularning harakatini avtomatlashtirilgan holda kuzatish hamda hisobga olish imkonini beradi;
«Elektron hukumat» tizimiga kiruvchi axborot tizimlari va ma’lumotlar bazalari, shu jumladan, ishlab chiqilayotgan «Sog‘liqni saqlash» kompleksi bilan kelgusida integratsiyalashtiriladi, bu dorixonalardan shifokor tomonidan tayinlangan farmatsevtika mahsulotlarni olish uchun asos bo‘ladigan — shifokorning elektron retseptini joriy etish imkonini beradi.
Loyiha buyurtmachisi — Sog‘liqni saqlash vazirligi, ishlab chiquvchi — «UZINFOCOM davlat axborot tizimlarini yaratish va qo‘llab-quvvatlash bo‘yicha yagona integrator» MCHJ, tizim operatoriesa — DSQ, uning ma’lumotlarni qayta ishlash markazi bazasida axborot tizimining tajriba shakli sinovdan o‘tkaziladi.
2020 yil 20 fevralgacha muddatda Vazirlar Mahkamasiga:
a) farmatsevtika mahsulotlarini yetkazib berish jarayonining barcha ishtirokchilarini axborot tizimiga ulashning yakuniy muddatlari, axborot tizimiga ulanmagan tashkilotlarga ularni realizatsiya qilishni taqiqlash;
b) dori vositalarining xavfsizligi to‘g‘risidagi umumiy texnik reglamentga farmatsevtika mahsulotlarini hisobga olish, hisobot berish va identifikatsiyalash jarayonlarini avtomatlashtirish va ular haqida zarur axborotni olish imkonini beruvchi majburiy maxsus markirovkalar tizimini joriy etishni nazarda tutuvchi o‘zgartirish va qo‘shimchalar;
v) farmatsevtika mahsulotlarini ishlab chiqarish va realizatsiya qilish uchun litsenziya talablariga litsenziyalar talabgorlari va egalarining axborot tizimiga ulanish bo‘yicha majburiyatlarini nazarda tutuvchi o‘zgartirishlar;
g) axborot tizimidan pulli asosda foydalanish tartibi to‘g‘risida takliflar kiritishlari kerak.
