Вазирлар Маҳкамасининг 2018 йил 18 сентябрдаги «Аҳолини фармацевтика маҳсулотлари билан таъминлаш тизимини янада такомиллаштириш чора-тадбирлари тўғрисида» 738-сон қарори қабул қилинди. Бу ҳақда Norma.uz хабар тарқатди.

Ҳукумат мамлакатимиз фармацевтика бозорининг асосий муаммоларини белгилади. Ҳисобга олиш ва ҳисоботнинг эскирган (қоғоз шакли) тизими, мажбурий идентификациялашнинг мавжуд эмаслиги, чекка туманларда инфратузилманинг ривожланмаганлиги ва фармацевтика маҳсулотлар ҳаракатини давлат томонидан назорат қилишнинг мавжуд эмаслиги шулар жумласидандир.

2019 йил 1 июлдан жорий этиладиган фармацевтика маҳсулотлари ҳаракатини назорат қилиш ва ҳисобга олишнинг ахборот тизими:

мамлакатимиз ҳудудида реализация қилинадиган фармацевтика маҳсулотлари ҳақида батафсил ахборот, бозор иштирокчилари (ишлаб чиқарувчидан истеъмолчигача) ва маҳсулотлар: тури, номи, ишлаб чиқариш ҳажми ва бошқалар тўғрисидаги маълумотларни йиғишни таъминлайди;

кўрсатилган маҳсулотларни махсус маркалашнинг таркибий қисмларини ишлаб чиқиш, шунингдек уларнинг ҳаракатини автоматлаштирилган ҳолда кузатиш ҳамда ҳисобга олиш имконини беради;

«Электрон ҳукумат» тизимига кирувчи ахборот тизимлари ва маълумотлар базалари, шу жумладан, ишлаб чиқилаётган «Соғлиқни сақлаш» комплекси билан келгусида интеграциялаштирилади, бу дорихоналардан шифокор томонидан тайинланган фармацевтика маҳсулотларни олиш учун асос бўладиган — шифокорнинг электрон рецептини жорий этиш имконини беради.

Лойиҳа буюртмачиси — Соғлиқни сақлаш вазирлиги, ишлаб чиқувчи — «UZINFOCOM давлат ахборот тизимларини яратиш ва қўллаб-қувватлаш бўйича ягона интегратор» МЧЖ, тизим операториэса — ДСҚ, унинг маълумотларни қайта ишлаш маркази базасида ахборот тизимининг тажриба шакли синовдан ўтказилади.

2020 йил 20 февралгача муддатда Вазирлар Маҳкамасига:

а) фармацевтика маҳсулотларини етказиб бериш жараёнининг барча иштирокчиларини ахборот тизимига улашнинг якуний муддатлари, ахборот тизимига уланмаган ташкилотларга уларни реализация қилишни тақиқлаш;

б) дори воситаларининг хавфсизлиги тўғрисидаги умумий техник регламентга фармацевтика маҳсулотларини ҳисобга олиш, ҳисобот бериш ва идентификациялаш жараёнларини автоматлаштириш ва улар ҳақида зарур ахборотни олиш имконини берувчи мажбурий махсус маркировкалар тизимини жорий этишни назарда тутувчи ўзгартириш ва қўшимчалар;

в) фармацевтика маҳсулотларини ишлаб чиқариш ва реализация қилиш учун лицензия талабларига лицензиялар талабгорлари ва эгаларининг ахборот тизимига уланиш бўйича мажбуриятларини назарда тутувчи ўзгартиришлар;

г) ахборот тизимидан пулли асосда фойдаланиш тартиби тўғрисида таклифлар киритишлари керак.