5 yanvar kuni yoshini kichraytirgani uchun O‘zbekiston Futbol assotsiatsiyasi rahbariyati qaroriga ko‘ra futbol bilan bog‘liq har qanday faoliyatdan umrbod chetlatilgan besh nafar futbolchi — Nodirbek Teshaboyev, Muhammadjon Abdullayev, Nuriddin Hasanov, Dilshod Ahmadaliyev, Burxon Hasanov Ramazon hayiti munosabati bilan kechirilishi mumkin. Bu haqda O‘zbekiston Futbol assotsiatsiyasi matbuot xizmati xabar qildi.
O‘tgan davr mobaynida ulardan aksari o‘z aybini tushunib yetdi, hujjatlar bilan bog‘liq masalalarni to‘g‘riladi. Shuningdek, tashkilotga bir necha bor xat bilan chiqib, qilgan ishidan pushaymon ekanini bildirdi, deyiladi xabarda.
«Hayotda hamma xato qiladi, buni tushunish mumkin. Biroq bitta xatoni ikki bor qaytalashni tushunib bo‘lmaydi. Futboldan chetlashtirilgan yigitlar hali ancha yosh. Ular xato yo‘lga kirganini tushunib yetdi. Mamlakatimiz Prezidenti bilmay ayb ish qilayotgan minglab insonlarni afv etayotgan bir vaqtlarida, biz ham tushunib-tushunmay noto‘g‘ri ishga qo‘l urgan futbolchilarga yana bir bor imkon berishimiz kerak. Endi ular g‘irromlik nima ekanini yaxshi tushunadi. Buyog‘iga ulardan o‘zini sportga bahshida etib, yuqori cho‘qqilar sari intilish talab etiladi», — dedi Milliy olimpiya qo‘mitasi rahbari Umid Ahmadjonov.
Tez orada O‘FA Ijroqo‘mi bu masalani atroflicha o‘rganib chiqadi hamda uzoq vaqt davomida boshqa ism-sharif bilan «nom qozongan» yigitlarga, o‘zlarining haqiqiy ism-shariflari bilan faoliyatlarini davom ettirish imkoniyatini yaratadi.
O‘FA shuningdek, futbol sohasidagi barcha murabbiylarni, mutaxassislarni jiddiy ravishda ogohlantirdi. Bundan buyon bu kabi ishlarga qarshi kurash yanada jiddiy bo‘ladi. Ayniqsa, yosh bolalarni va ularning ota-onasini yo‘ldan urmoqchi bo‘lgan yoki allaqachon ularning xayolini aynitib bo‘lgan murabbiylar kechirilmaydi. Bunday insonlar futbolga qayta yaqinlashtirilmaydi. Shuningdek, farzandi katta ekanini bilib turib, uning kichik bolalarga qarshi to‘p surishiga shunchaki tomoshabin bo‘lib turgan ota-onalar ham jazodan chetda qolmaydi. Bolasining hujjatini soxtalashtirayotgan ota-onalar qonun oldida javob berishlariga to‘g‘ri keladi. O‘FA bu masala yuzasidan tegishli organlar bilan hamkorlikda ishlaydi.
«Yillar davomida o‘smirlarimiz qo‘lga kiritib kelgan yutuqlarga shubha bilan qarashimizning o‘ziyoq uyat. Biz nafaqat bolalar futbolini, balki o‘zimizni aldab kelganmiz. Bizda bolalardan natija talab qilinmaydi, biz katta futboldan natija kutamiz. Bolalar sportini esa sofligicha qoldirish tarafdorimiz. O‘z navbatida mana shu soflikka rahna soladigan insonlarga oramizda joy yo‘q», — deb fikr bildirdi O‘FA birinchi vitse-prezidenti.
Tashkilot faqatgina jazo qo‘llash ishlari bilan band bo‘lmaydi va bunday illatni yo‘q qilish yo‘lida amaliy usullardan ham foydalanadi. 2019 yildan boshlab bolalar futbol klublari tarbiyalanuvchilarini yaxlit elektron bazaga bosqichma-bosqich kiritib borish boshlanadi. Ya’ni, maktab yoshidagi futbolchi haqida barcha ma’lumotlar, shu futbolchi to millionlar o‘yini bilan xayrlashmaguniga qadar yangilanib turadi. Bu esa 14−15 yoshli yangi futbolchining birdan «paydo bo‘lib qolishi» holatlarini kamaytiradi. Nazorat maktab yoshidanoq boshlanadi. Yaxlit elektron bazadan istalgan odam Superliga, Pro-Liga, 2-liga, bolalar ligalari futbolchilarini topishi mumkin bo‘ladi.
O‘FA Ijroqo‘mining qarori tez orada e’lon qilinadi.
http://the-uff.com/news/sections/uff/11347
