Камбағалликни қисқартириш ва бандлик вазири Беҳзод Мусаев ривожланган мамлакатларда меҳнат ресурсларига талаб юқорилиги ва бу мамлакатларнинг Ўзбекистонга қизиқиш билдиргани ҳақида гапирди. Бу ҳақда у президент Шавкат Мирзиёев билан меҳнат миграциясини тартибга солиш масалаларига бағишланган йиғилиш якунлари бўйича маълумот берди.
«Ҳозирги кунда дунё ривожланган мамлакатларида меҳнат ресурсларига бўлган талаб жуда юқори. Бу демографик фактор, туғилишнинг камайиши билан боғлиқ. Мисол учун, Канада, Буюк Британия, Германия, Япония, Жанубий Корея, Шарқий Европа мамлакатлари — Польша, Венгрия, Словенияда бир қатор меҳнат ресурсларига бўлган талаб бор. Уларни талабларининг энг қизиқарли томони, албатта, ойлиги юқори. Энг кичик ойлик малакаси, йўналишига қараб 1500 доллардан 3000 долларгача», — деди Беҳзод Мусаев «Ўзбекистон 24» телеканалига берган интервьюсида.
Унинг сўзларига кўра, 2024 йилда Ўзбекистон 2000 нафар ўзбекистонлик ёш фуқароларни 5−6 ой муддатга мавсумий ишлар учун Буюк Британияга жўнатган.
«Бу янги касб ва янги стандартларни ўрганиш имкониятини беради, шунда улар ўз юртига қайтиб келгач, шахсий бизнесини яратиш учун молиявий имкониятга эга бўладилар. Шу сабабларга кўра, Бандлик вазирлигига маҳалладан бошлаб шундай шахсларни танлаш бўйича жуда жиддий вазифа қўйилди», — деди у.
«Энг асосийси, шу ишга кетмоқчи бўлган одамда, албатта, харажатлари бўлади. Яъни виза олиш, тил ўрганиш, касб ўрганиш, юридик, соғлиғини муҳофаза қилиш билан боғлиқ бўлган харажатлар бўлади. Ҳар бир харажатни шунга эҳтиёжи бўлган шахсларга давлат томонидан маблағни ажратиш ҳақидаги аниқ кўрсатмалар ҳам берилди», — деди Беҳзод Мусаев.
Президент Шавкат Мирзиёев аввалроқ Ўзбекистон фуқароларининг ташқи меҳнат бозорига чиқишини осонлаштириш, меҳнат миграциясидан қайтган шахсларнинг бандлигини таъминлаш чораларини кўриш вазифасини қўйган эди. Шу боис меҳнат миграцияси тизимини такомиллаштириш бўйича таклифлар ишлаб чиқилди.
Хусусан, мигрантларнинг ишчи виза, йўл чиптаси, хорижий тил ва касб бўйича малакани баҳолатиш харажатлари қисман қопланади. Чет тили бўйича халқаро ёки унга тенглаштирилган сертификат олган фуқарога тил ўрганиш учун сарфлаган харажатининг 50 фоизи қоплаб берилади.
Меҳнат миграцияси оқимининг диверсификацияси
Ташқи меҳнат миграцияси агентлиги аввалроқ Германияда ўзбекистонликлар учун 50 минг бўш иш ўрни мавжудлиги ҳақида эълон берганди. Фуқаролар ҳамширалик, ҳайдовчилик касблари, шунингдек, меҳмонхона, ресторан, туризм ва бошқа соҳаларда ишлаши мумкин.
Камбағалликни қисқартириш ва бандлик вазири Беҳзод Мусаев Канаданинг Ўзбекистондаги элчиси Алам Хемсон билан учрашиб, меҳнат миграцияси соҳасида ҳамкорликни йўлга қўйиш масалаларини муҳокама қилган.
Ўзбекистондан меҳнат миграцияси оқими асосан бир қанча яқин мамлакатларда, хусусан, пул ўтказмалари оқимининг асосий қисмини ташкил этувчи Россия ва Қозоғистонда тўпланган. Шу билан бирга, Марказий банки қайд этганидек, аста-секин бу оқимларда географик диверсификация кузатилмоқда. Хусусан, Россиядан пул ўтказмаларининг улуши 87 фоиздан 78 фоизга камайган.
2022 йилда мамлакатдаги мавсумий ишчиларнинг қарийб чорак қисми Марказий Осиё, хусусан, Ўзбекистондан келган. Мамлакатда мавсумий меҳнат муҳожирлари сони бўйича Ўзбекистон Украинадан кейин иккинчи ўринда туради.
Аввалроқ президент чет элда ишлаётган ўзбекистонликларнинг аксарияти оддий ва оғир, кам иш ҳақи тўланадиган меҳнат билан шуғулланаётганини айтганди. Ривожланган мамлакатлар билан жуда катта келишувлар доирасида 150 минг ишчига буюртма берилган бўлса-да, бор-йўғи 9 минг ишчи юборилган. Бандлик вазирлигига 100 минг ишчига касб-ҳунар ва тил ўргатиб, уюшган ҳолда чет эл корхоналарига ишга юбориш вазифаси топширилган.
