АҚШ ҳукумати Россия расмийларини «Крокус сити ҳолл» концерт зали ҳужумдан камида икки ҳафта олдин потенциал террорчилар нишони экани ҳақида огоҳлантирган, деб ёзди Washington Post вазият билан таниш бўлган исми ноаниқ АҚШ расмийсига таяниб.
Нашрнинг қайд этишича, «юқори даражадаги аниқлик» сабаб Вашингтон теракт ИШИД томонидан тайёрланганига ишонч билдирган. Бу тўғридан-тўғри Москванинг АҚШ огоҳлантиришлари ҳужумнинг олдини олиш учун жуда умумий бўлгани ҳақидаги даъволарига зид келади, дея таъкидлайди газета.
Washington Post манбаларига кўра, АҚШ Россия томонига маълумотни 6 март куни — Американинг Москвадаги элчихонаси ўз фуқароларига одамлар гавжум жойларда, жумладан, концерт залларида содир этилиши мумкин бўлган терактлар ҳақида огоҳлантириш берганидан бир кун аввал узатган.
Шу билан бирга, нашрнинг қайд этишича, Россия расмийлари, ҳеч бўлмаганда, дастлабки босқичда огоҳлантиришни жиддий қабул қилганига ишоралар бор. Газета манбаларидан бирига кўра, АҚШ хабарида ИШИДнинг синагогага ҳужум қилиш режалари ҳақида ҳам маълумотлар бўлган. «ФСБ» маълумот олинган куннинг эртасига ИШИД Москвадаги ибодатхонага режалаштирган ҳужумнинг олди олинганини маълум қилган.
Дастлабки огоҳлантиришдан кейин Россия нима учун хавфсизлик чораларини кучайтирмагани номаълум. Америка расмийларининг тахмин қилишича, эҳтимол, Россия разведка идоралари АҚШ маълумотларини нотўғри деб ҳисоблаган, чунки ҳужум 7 мартдан сўнг содир бўлмаган ва бу уларнинг ҳушёрлигини юмшатган, деб ёзади Washington Post.
Шунингдек, New York Times газетасининг ёзишича, АҚШнинг Москва вилоятидаги ҳужумдан олдинги огоҳлантириши жуда аниқ бўлган. Америка разведка хизматлари Россия томонига «Крокус сити ҳолл» ИШИДнинг потенциал нишони эканини маълум қилган, деб ёзди нашр ўз манбаларига таяниб.
Огоҳлантиришда жой тўғри кўрсатилган, бироқ вақт аниқ эмас эди, бу эса ҳужум бир неча кун ичида содир бўлиши мумкинлигини кўрсатарди, дея хабар берди New York Times.
АҚШ ИШИД ва унинг Афғонистондаги бўлинмаси — ИШИД-Хуросоннинг эҳтимолий махфий режалари ҳақида жадал равишда разведка маълумотларини йиғмоқда, деб ёзади нашр. Америка разведка идоралари яқинлашиб келаётган террористик ҳужумлар ҳақида олган маълумотларини, ҳатто, душман давлатлар билан ҳам баҳам кўради. Мисол учун, АҚШ Эронни ИШИД Керманда январь ойида содир бўлган ҳужумга тайёргарланаётгани ҳақида ҳам огоҳлантирган. Аммо, худди Россияда бўлгани каби, «огоҳлантиришларга эътибор берилмаган», дея таъкидлади New York Times.
2 апрель куни Россия Ташқи разведка хизмати раҳбари Сергей Наришкин «ФСБ» АҚШ расмийларидан эҳтимолий теракт ҳақида огоҳлантириш олганини, бироқ бу маълумот аниқ бўлмаганини айтганди. «Маълумотлар жуда умумий эди ва бу даҳшатли жиноятда иштирок этганларни тўлиқ аниқлашга имкон бермади», — деганди у.
- 22 март куни Москва вилоятидаги «Крокус сити ҳолл» концерт залига бир неча қуролланган шахс бостириб кириб, ўт очган. Улар бинони ҳам ёқиб юборган, у бутунлай ёниб кетган. Сўнгги маълумотларга кўра, теракт оқибатида 140 дан ортиқ киши ҳалок бўлган, 360 дан ортиқ киши жароҳатланган, 11 киши терактни содир этганликда гумонланиб ҳибсга олинган. Бу ишда асосий айбланувчилар сифатида Марказий Осиёдан келган муҳожирлар кўрилмоқда.
- Ҳужум учун жавобгарликни ИШИД-Хуросон ўз зиммасига олди. Бироқ Россия расмийлари ҳужумга Украинанинг алоқадорлигини даъво қилмоқда. Бу ҳақда Россия президенти Владимир Путин, «ФСБ» директори Александр Бортников ва Россия Хавфсизлик кенгаши котиби Николай Патрушев гапирди. Украина Киевнинг ҳужумга алоқадорлигини бир неча бор рад этиб, бундай айбловларни «Кремль томонидан режалаштирилган провокация» деб атаган.
