2023 йил якунига кўра Apple биринчи марта дунёдаги энг йирик смартфон етказиб берувчига айланди. International Data Corporation (IDC) тадқиқот гуруҳи маълумотларига кўра, Samsung 2010 йилдан то бунгача етакчилик қилиб келганди.
IDC`нинг дастлабки ҳисоб-китобларига кўра, ўтган йили Apple 234,5 миллион дона қурилма етказиб берди, компаниянинг бозордаги улуши 20,1 фоизни ташкил қилди. Samsung эса 226,6 миллионта смартфон (19,4 фоиз) етказиб берди.
Жаҳон етакчилари орасида учинчи ўринда 145,9 миллион дона смартфон етказиб берган ва бозор улуши 12,5 фоизни ташкил этган Хитойнинг Xiaomi компанияси жой олди. Бешликка, шунингдек, Oppo (103,1 миллион) ва Transsion (94,9 миллион) кирди.
IDC Worldwide Tracker тадқиқот директори Набила Попалнинг таъкидлашича, кучли учлик орасида Apple «ҳар йили ижобий ўсишни кўрсатадиган ягона ўйинчи». Бу, Попалнинг сўзларига кўра, ҳозирда бозорнинг 20 фоиздан ортиғини эгаллаган премиум қурилмаларнинг ўсиб бораётган тенденцияси билан изоҳланади.
IDC ҳисоботида айтилишича, глобал смартфонлар бозори 2023 йилда 3,2 фоизга камайиб, 1,17 миллиард донани ташкил этган ҳолда «қийинчиликни бошдан кечирмоқда». Ҳисобот муаллифлари бу сўнгги ўн йилдаги энг паст кўрсаткич эканлигини таъкидлаб, бунга сабаб сифатида макроиқтисодий ноаниқлик ва йил бошида омборларнинг ҳаддан ташқари кўп тўлиб кетганини кўрсатмоқда.
Бироқ, IDC таъкидлашича, йилнинг иккинчи ярмида бозор тикланиш белгиларини кўрсатди — тўртинчи чоракда ўсиш 8,5 фоизни (326,1 миллион дона) ташкил этиб, 7,3 фоиз ўсиш кутилаётган прогнозлардан ошиб кетди.
