Шавкат Мирзиёев 14 декабрь куни бўлиб ўтган йиғилишда Ўзбекистонда ишлаб чиқариш таннархини камайтириш ва автомобилларни маҳаллийлаштириш даражасини ошириш бўйича топшириқ берди. Бу ҳақда «Ўзавтосаноат» компанияси бошқаруви раиси Улуғбек Розуқулов «Ўзбекистон 24» телеканалига берган интервюсида маълум қилди.
Унга кўра, давлат раҳбари ҳудудларда кичик хусусий тадбиркорлик субъектлари билан ҳамкорликни кенгайтириш вазифасини ҳам қўйди.
«Яна бир йўналиш — дилерлик тизимини такомиллаштириш ва ҳозирги кунда кўплаб аҳоли томонидан [билдирилаётган] эътирозларни бартараф этиш. Қолаверса, янги лойиҳалар бўйича ҳам топшириқмалар берилди — бу нафақат Ўзбекистонда, балки ҳамкорликда ишлаётган хорижий мамлакатларда ҳам маҳаллийлаштириш даражасини кўпайтиришдир», — деди «Ўзавтосаноат» раҳбари. Гап экспорт салоҳиятини оширадиган лойиҳалар ҳақида бормоқда.
Йиғилишда соҳада 2 мингдан зиёд корхона яхлит кооперация тармоғига боғлангани ва 50 фоиз маҳаллийлаштириш таъминлангани таъкидланди. 2030 йилгача мамлакатда енгил автомобиллар ишлаб чиқаришни 1 миллион донага етказиш режалаштирилган. Президент, шунингдек, электромобиллар ишлаб чиқаришни ривожлантиришни кечиктирмасликка чақирди.
Август ойида UzAuto Motors Lacetti, Cobalt, Damas ва Labo учун шартномалар чиқаришни қайта тиклади ва бир кунда 51 мингдан ортиқ шартномани расмийлаштирди. Сентябрь ойида бир неча соат ичида яна 28 минг автомобилга шартномалар тузилди. Навбатлар 30 октябрь куни ҳам юзага келган, ўшанда автомобиль етказиб бериш қайта бошлангани ҳақида миш-мишлар пайдо бўлганди.
Компания аввалроқ декабрь ойининг иккинчи ярмида (аниқ сана компаниянинг расмий каналларида алоҳида эълон қилинади) 2024 йилда ишлаб чиқариладиган оммабоп автомобиллар учун онлайн контрактация очилиши режалаштирилаётгани ҳақида хабар берганди:
- Cobalt — 124 264 000 сўмдан;
- Damas — 93 156 000 сўмдан;
- Labo — 93 771 000 сўмдан.
Gentra/Lacetti ишлаб чиқариш 2024 йил 1 январдан тўхтатилади.
